వినాయకపురం ప్రాధమిక ఆరోగ్య కేంద్రంను ఆకస్మిక తనఖీ

భద్రాద్రి కొత్తగూడెం జిల్లా వైద్య ఆరోగ్య శాఖాధికారి డాక్టర్ తుకారాం రాథోడ్ వినాయకపురం ప్రాథమిక ఆరోగ్య కేంద్రాన్ని ఆకస్మికంగా తనిఖీ చేశారు. అనంతరం అశ్వరావుపేట, దమ్మపేట మండలాల్లోని ప్రైవేట్ రక్త పరీక్ష కేంద్రాల నిర్వాహకులతో సమావేశం నిర్వహించి, వైద్య శాఖ నిబంధనలను తప్పనిసరిగా పాటించాలని ఆదేశించారు.

ప్రతి ప్రైవేట్ ల్యాబ్‌కు చెల్లుబాటు అయ్యే రిజిస్ట్రేషన్, ఫైర్ సేఫ్టీ, బయోమెడికల్ వ్యర్థాల నిర్వహణ, కాలుష్య నియంత్రణ ధ్రువపత్రాలు తప్పనిసరిగా ఉండాలని డీఎంహెచ్‌వో స్పష్టం చేశారు. అర్హత కలిగిన ఎంబీబీఎస్ వైద్యుల సలహా మేరకే పరీక్షలు నిర్వహించాలని సూచించారు.

ల్యాబ్‌లను నిర్వహించే సిబ్బంది తప్పనిసరిగా సంబంధిత శిక్షణ పొందిన వారై ఉండాలని, పరీక్షల్లో ఉపయోగించే రీజెంట్లు గడువు తేదీ లోపే ఉండాలని తెలిపారు. నాణ్యత ప్రమాణాలను పాటించడంలో ఎలాంటి నిర్లక్ష్యం ఉండకూడదని హెచ్చరించారు.

మలేరియా, డెంగీ వంటి వ్యాధుల నిర్ధారణలో పాజిటివ్‌గా తేలిన కేసుల వివరాలను వెంటనే సంబంధిత వైద్య ఆరోగ్య శాఖ అధికారులకు తెలియజేయాలని ఆదేశించారు. అంటువ్యాధుల నియంత్రణలో ఈ సమాచారం కీలకమని పేర్కొన్నారు.

గిరిజన సమీకృత సంస్థ ప్రాజెక్టు అధికారి నిర్ణయించిన పరీక్షల రుసుములనే వసూలు చేయాలని, ప్రజల నుంచి అదనపు ఛార్జీలు తీసుకోరాదని సూచించారు. ల్యాబ్‌లలో పరీక్షలకే పరిమితమై, వైద్యుల సూచన లేకుండా స్వయంగా చికిత్స అందించరాదని అధికారులు స్పష్టం చేశారు.

ఈ సమావేశంలో వైద్య అధికారులు డాక్టర్ రాందాస్, డాక్టర్ నౌసిన్‌తో పాటు రెండు మండలాల ప్రైవేట్ ల్యాబ్‌ల ఇన్‌ఛార్జీలు, వెంకటేశ్వరరావు, హెల్త్ అసిస్టెంట్లు పాల్గొన్నారు. ప్రజలకు నాణ్యమైన వైద్య సేవలు అందించేలా అన్ని ల్యాబ్‌లు ప్రభుత్వ నిబంధనలను కచ్చితంగా అమలు చేయాలని అధికారులు సూచించారు.