అర్హులైన ప్రతి కుటుంబానికి ఎన్టీఆర్ భరోసా: పనబాక లక్ష్మి

తిరుపతి: అర్హత ఉన్న ప్రతి కుటుంబానికి ఎన్టీఆర్ భరోసా పింఛన్ అందించడమే కూటమి ప్రభుత్వ లక్ష్యమని తిరుపతి పార్లమెంట్ అధ్యక్షులు డాక్టర్ పనబాక లక్ష్మి తెలిపారు. తిరుపతి నియోజకవర్గ పరిధిలోని క్లస్టర్–5, వార్డు–1లో ఉన్న తిరుమలరెడ్డి నగర్ సచివాలయంలో కొత్త పింఛన్ల కోసం దరఖాస్తుల స్వీకరణ ప్రక్రియను ఆమె పరిశీలించారు. సచివాలయంలో అధికారులు చేపడుతున్న దరఖాస్తుల స్వీకరణ, పరిశీలన ప్రక్రియపై వివరాలు తెలుసుకున్నారు.

అర్హులైన ప్రతి ఒక్కరికీ ప్రభుత్వ పింఛన్ అందేలా అధికారులు ప్రత్యేక శ్రద్ధ తీసుకోవాలని పనబాక లక్ష్మి సూచించారు. దరఖాస్తుల స్వీకరణ సమయంలో ప్రజలకు ఎలాంటి ఇబ్బందులు, అనవసర జాప్యం కలగకుండా తగిన ఏర్పాట్లు చేయాలని చెప్పారు. అర్హత కలిగిన కుటుంబాలు పింఛన్ కోసం దరఖాస్తు చేసుకునేలా అవసరమైన అవగాహన కల్పించాలని, అర్హతలను పారదర్శకంగా పరిశీలించి ప్రభుత్వ నిబంధనల ప్రకారం చర్యలు తీసుకోవాలని సూచించారు.

అనంతరం సచివాలయానికి వచ్చిన ప్రజలను పనబాక లక్ష్మి స్వయంగా కలిసి వారి సమస్యలను అడిగి తెలుసుకున్నారు. పింఛన్లకు సంబంధించిన ఇబ్బందులు, ఇతర స్థానిక సమస్యలపై ప్రజల నుంచి వివరాలు సేకరించారు. ప్రజలు తెలిపిన సమస్యలను సంబంధిత అధికారుల దృష్టికి తీసుకెళ్లి, వాటి పరిష్కారానికి తగిన చర్యలు తీసుకోవాలని సూచించారు. ప్రభుత్వ సంక్షేమ పథకాలు అర్హులైన లబ్ధిదారులకు చేరేలా అధికారులు, ప్రజాప్రతినిధులు సమన్వయంతో పనిచేయాలని ఆమె పేర్కొన్నారు.

ఈ కార్యక్రమంలో ఏపీ రాష్ట్ర ఎస్సీ కార్పొరేషన్ డైరెక్టర్, రాష్ట్ర పార్టీ కార్యదర్శి డాక్టర్ పూరిమిట్ల కుమారి, పార్లమెంట్ వైస్ ప్రెసిడెంట్ యశ్వంత్ రెడ్డి, పార్లమెంట్ సెక్రటరీ రేవతి, టీడీపీ యువ నాయకురాలు, వార్డు అధ్యక్షురాలు పూరిమిట్ల రాణి, పార్టీ నాయకులు, కార్యకర్తలు పాల్గొన్నారు. ఎన్టీఆర్ భరోసా ద్వారా అర్హులైన కుటుంబాలకు సామాజిక భద్రత కల్పించేందుకు ప్రభుత్వం చర్యలు కొనసాగిస్తోందని నాయకులు తెలిపారు.