చీకటి గోపి కుటుంబానికి న్యాయం చేయాలి: మందకృష్ణ

గుంటూరు: చీకటి గోపి మృతి ఘటనపై రాష్ట్ర ప్రభుత్వం వెంటనే స్పందించి, సీనియర్‌ ఐపీఎస్‌ అధికారితో ప్రత్యేక దర్యాప్తు బృందం విచారణ చేపట్టాలని ఎమ్మార్పీఎస్‌ జాతీయ అధ్యక్షుడు మందకృష్ణ మాదిగ డిమాండ్‌ చేశారు. గోపి కుటుంబానికి న్యాయం చేయకపోతే దళిత సంఘాలతో కలిసి ఉద్యమాన్ని మరింత ఉధృతం చేస్తామని హెచ్చరించారు. గుంటూరు సిందూరి హోటల్‌లో శుక్రవారం నిర్వహించిన మీడియా సమావేశంలో ఆయన మాట్లాడారు.

చీకటి గోపి పేద దళిత కుటుంబానికి చెందిన వ్యక్తి అని మందకృష్ణ మాదిగ తెలిపారు. గోపిపై ఎలాంటి కేసులు లేవని చెప్పారు. బంగారం చోరీ కేసు విచారణలో భాగంగా పోలీసులు గోపిని తీసుకెళ్లారని, ఆ సమయంలో జరిగిన పరిణామాలపై కుటుంబ సభ్యులు తీవ్ర ఆరోపణలు చేస్తున్నారని తెలిపారు. గోపి మృతిపై ప్రభుత్వం తక్షణమే స్పందించి, వాస్తవాలను వెలుగులోకి తీసుకురావాలని డిమాండ్‌ చేశారు.

గోపి భార్య జ్యోతి మాట్లాడుతూ.. బంగారం చోరీ కేసులో తన భర్తను పోలీసులు తీసుకెళ్లారని ఆరోపించారు. పోలీస్‌ స్టేషన్‌లో గోపిని తీవ్రంగా కొట్టారని, ఆయన ఒంటిపై గాయాలు, వాతలు కనిపించాయని తెలిపారు. పోలీసుల దెబ్బల కారణంగా గోపి కాళ్లు పడిపోయాయని ఆమె ఆరోపించారు. అర్ధరాత్రి సమయంలో గోపి ఆరోగ్యం బాగోలేదని సమాచారం రావడంతో ఆసుపత్రికి తీసుకెళ్లగా, అప్పటికే ఆయన మృతి చెందినట్లు వైద్యులు తెలిపారని పేర్కొన్నారు.

తన భర్త మృతికి పోలీసులే కారణమని జ్యోతి ఆరోపించారు. తమ కుటుంబం తీవ్ర విషాదంలో ఉందని, ప్రభుత్వం వెంటనే స్పందించి తమకు న్యాయం చేయాలని విజ్ఞప్తి చేశారు. గోపి మృతికి దారితీసిన పరిస్థితులపై సమగ్ర దర్యాప్తు జరిపి, బాధ్యులపై చట్టపరమైన చర్యలు తీసుకోవాలని కోరారు.

మందకృష్ణ మాదిగ మాట్లాడుతూ.. దొంగతనం కేసులో మరో వ్యక్తి గోపి వద్ద రూ.10 వేలు అప్పుగా తీసుకున్న విషయాన్ని పోలీసులు విచారణలో ప్రస్తావించారని తెలిపారు. ఈ అంశాన్ని విచారించే క్రమంలో గోపిపై దాడి చేశారని ఆరోపించారు. పోలీసుల చిత్రహింసల కారణంగానే గోపి మృతి చెందాడని ఆయన ఆరోపించారు. గోపి మృతదేహంపై కనిపించిన పరిస్థితులే తమ ఆరోపణలకు సాక్ష్యమని పేర్కొన్నారు.

గోపి మృతిపై ఎమ్మార్పీఎస్‌ స్పందించిన తర్వాత మరో సీఐతో విచారణ జరిపించారని మందకృష్ణ మాదిగ తెలిపారు. అయితే ఈ విచారణతో అసలు వాస్తవాలు బయటకు రావని, పోలీసు ఉన్నతాధికారులు సంబంధిత సీఐ, ఎస్‌ఐలను తప్పించే ప్రయత్నం చేస్తున్నారని ఆరోపించారు. ఘటనకు బాధ్యులైన పోలీసు అధికారులపై నిష్పక్షపాతంగా దర్యాప్తు జరగాలంటే సీనియర్‌ ఐపీఎస్‌ అధికారి ఆధ్వర్యంలో ప్రత్యేక దర్యాప్తు బృందాన్ని ఏర్పాటు చేయాలని డిమాండ్‌ చేశారు.

దళితులకు ఒక న్యాయం, అగ్రకులాలకు మరో న్యాయం జరుగుతోందని మందకృష్ణ మాదిగ విమర్శించారు. చీకటి గోపి పేద దళిత కుటుంబానికి చెందిన వ్యక్తి కావడంతోనే న్యాయం ఆలస్యం అవుతోందనే భావన కలగకుండా ప్రభుత్వం తక్షణ చర్యలు తీసుకోవాలని కోరారు. చట్టం ముందు అందరూ సమానమేనని నిరూపించేలా ఈ ఘటనపై పారదర్శక దర్యాప్తు చేపట్టాలని డిమాండ్‌ చేశారు.

చీకటి గోపి కుటుంబాన్ని ముఖ్యమంత్రి చంద్రబాబు నాయుడు స్వయంగా పరామర్శించాలని మందకృష్ణ మాదిగ కోరారు. బాధిత కుటుంబానికి రూ.25 లక్షల పరిహారం ప్రకటించడంతో పాటు కుటుంబంలో ఒకరికి ప్రభుత్వ ఉద్యోగం ఇవ్వాలని డిమాండ్‌ చేశారు. ఘటనకు బాధ్యులుగా ఆరోపణలు ఎదుర్కొంటున్న సీఐ, ఎస్‌ఐలపై ఎస్సీ, ఎస్టీ అట్రాసిటీ చట్టం కింద కేసులు నమోదు చేయాలని కోరారు.

ప్రభుత్వం వెంటనే స్పందించి సిట్‌తో సమగ్ర దర్యాప్తు చేపట్టి, చీకటి గోపి కుటుంబానికి న్యాయం చేయాలని మందకృష్ణ మాదిగ స్పష్టం చేశారు. లేకపోతే దళిత సంఘాలతో కలిసి ఉద్యమాన్ని ఉధృతం చేస్తామని హెచ్చరించారు. బాధిత కుటుంబానికి న్యాయం జరిగే వరకు పోరాటం కొనసాగిస్తామని తెలిపారు.