భారత్‌పై అమెరికా 12.5% సుంకం ముప్పు.. ఏ రంగాలకు దెబ్బ?

భారత్–అమెరికా వాణిజ్య సంబంధాలపై మరోసారి అనిశ్చితి నెలకొంది. అమెరికా సెక్షన్ 301 కింద భారత్ సహా పలు దేశాల నుంచి దిగుమతులపై అదనంగా 12.5 శాతం వరకు సుంకం (టారిఫ్) విధించే ప్రతిపాదనను ముందుకు తీసుకురావడంతో భారత ఎగుమతిదారులు, పరిశ్రమలు ఆందోళన వ్యక్తం చేస్తున్నాయి. ఈ ప్రతిపాదన ఇంకా తుది నిర్ణయంగా మారకపోయినా, అమల్లోకి వస్తే భారత ఎగుమతులు, ద్వైపాక్షిక వాణిజ్యం, కొనసాగుతున్న భారత్–అమెరికా వాణిజ్య ఒప్పంద చర్చలపై ప్రభావం చూపే అవకాశం ఉందని నిపుణులు భావిస్తున్నారు అమెరికా ట్రేడ్ యాక్ట్, 1974లోని సెక్షన్ 301 ప్రకారం, ఇతర దేశాల వాణిజ్య విధానాలు అమెరికా వ్యాపార ప్రయోజనాలకు అన్యాయంగా ఉన్నాయని అమెరికా ప్రభుత్వం భావిస్తే, దర్యాప్తు నిర్వహించి అదనపు సుంకాలు లేదా ఇతర వాణిజ్య చర్యలు తీసుకునే అధికారం ఉంటుంది. ఈసారి అమెరికా వాణిజ్య ప్రతినిధి కార్యాలయం (USTR) నిర్వహించిన దర్యాప్తులో, కొన్ని దేశాలు బలవంతపు శ్రమ (Forced Labour)తో తయారైన ఉత్పత్తుల దిగుమతులను అడ్డుకోవడంలో తగిన చర్యలు తీసుకోలేదని పేర్కొంటూ భారత్‌తో పాటు మొత్తం 60 ఆర్థిక వ్యవస్థలపై అదనపు సుంకాలను ప్రతిపాదించింది అమెరికా వాదన ప్రకారం, బలవంతపు శ్రమతో తయారైన ఉత్పత్తులు ప్రపంచ సరఫరా గొలుసుల్లోకి ప్రవేశించకుండా దేశాలు సమర్థంగా చర్యలు తీసుకోవాలి. భారత్ ఈ అంశంలో తగిన అమలు చర్యలు చేపట్టలేదని USTR పేర్కొంది. మరోవైపు భారత్ ఈ ఆరోపణలను తిరస్కరిస్తూ, దేశానికే ప్రత్యేకంగా ఆధారాలతో కూడిన సమగ్ర విశ్లేషణ లేకుండా ఈ ప్రతిపాదన చేయడం సరికాదని అమెరికాను పునఃపరిశీలించాలని కోరింది.