హార్ముజ్ జలసంధి వద్ద అమెరికా డ్రోన్‌ను స్వాధీనం చేసుకున్న ఇరాన్

అంతర్జాతీయంగా అత్యంత కీలకమైన ఇంధన రవాణా మార్గమైన హార్ముజ్ జలసంధి ప్రాంతంలో ఇరాన్ మరియు అమెరికా మధ్య ఉద్రిక్తతలు ఒక్కసారిగా తారాస్థాయికి చేరాయి. ఈ కీలక ప్రాంతంలో అమెరికాకు చెందిన ఒక మానవరహిత నీటిలోపలి డ్రోన్‌ను (UUV) తాము విజయవంతంగా స్వాధీనం చేసుకున్నట్లు ఇరాన్ ఇస్లామిక్ రివల్యూషనరీ గార్డ్ కార్ప్స్ (IRGC) అధికారికంగా ప్రకటించింది. అంతేకాకుండా, ఆ డ్రోన్‌కు సంబంధించిన చిత్రాలను కూడా ఇరాన్ విడుదల చేసి, దీనిని తమ దేశానికి దక్కిన ఒక పెద్ద గూఢచార మరియు సైనిక విజయంగా అభివర్ణించింది. అమెరికా రక్షణ సాంకేతిక సంస్థ అన్దురిల్ (Anduril) తయారు చేసిన 'డైవ్-ఎల్డీ' (Dive-LD) స్వయంప్రతిపత్త అండర్‌వాటర్ సిస్టమ్‌గా దీనిని గుర్తించినట్లు అసోసియేటెడ్ ప్రెస్ వార్తా సంస్థ నివేదించింది. మరోవైపు, ఇరాన్ ప్రకటనను వాషింగ్టన్ తీవ్రంగా ఖండించింది. ఇరాన్ చెబుతున్నదానికి పూర్తి భిన్నమైన వాదనను అమెరికా పెంటగాన్ వినిపించింది. తాము ఒక అండర్‌వాటర్ డ్రోన్‌ను కోల్పోయిన మాట వాస్తవమే అయినప్పటికీ, ఇరాన్ చెబుతున్నట్లు దానిని వారు స్వాధీనం చేసుకోలేదని స్పష్టం చేసింది. ప్రాంతీయ జలాలను సర్వే చేస్తుండగా ఒక రోజు ముందే ఆ పరికరం సాంకేతిక లోపంతో పనిచేయడం మానేసిందని అమెరికా పేర్కొంది. ఆ డ్రోన్ చాలా పాత మోడల్ అని, దానిలో ఎలాంటి రహస్య సోనార్, రాడార్ పరికరాలు లేదా సున్నితమైన సమాచారాన్ని సేకరించే సాంకేతికత లేదని రక్షణ శాఖ అధికారులు స్పష్టం చేశారు. అయితే ఇరాన్ చేస్తున్న వాదనలను స్వతంత్రంగా ధృవీకరించలేమని రాయిటర్స్ వార్తా సంస్థ వెల్లడించింది. ప్రస్తుతం ఈ పరిణామాల నేపథ్యంలో హార్ముజ్ జలసంధి గుండా సాగే నౌకాదవాణా భారీగా పడిపోయింది. చమురు రవాణా మార్గంలో నెలకొన్న ఈ భద్రతా ఆందోళనల కారణంగా అంతర్జాతీయ మార్కెట్లో చమురు ధరలు బ్యారెల్‌కు 100 డాలర్ల మార్కును దాటి దూసుకుపోతున్నాయి. పశ్చిమాసియాలో పెరుగుతున్న ఈ ఉద్రిక్తతలు ప్రపంచ ఆర్థిక వ్యవస్థపై మరియు ఇంధన సరఫరా గొలుసుపై తీవ్ర ప్రభావాన్ని చూపుతున్నాయి. ఇరాన్-అమెరికా మధ్య నడుస్తున్న ఈ ఆధిపత్య పోరు రాబోయే రోజుల్లో ఎటువంటి పరిణామాలకు దారితీస్తుందనే అంశంపై ప్రపంచ దేశాలు తీవ్ర ఆందోళన వ్యక్తం చేస్తున్నాయి.