మెదడు రహస్యాలకు భారత శాస్త్రవేత్తల డిజిటల్ మ్యాప్

మానవ మెదడు రహస్యాలను ఛేదించే దిశగా భారత శాస్త్రవేత్తలు మరో కీలక మైలురాయిని అధిగమించారు. చెన్నైలోని ఐఐటీ మద్రాస్ పరిధిలో పనిచేస్తున్న సుధా గోపాలకృష్ణన్ బ్రెయిన్ సెంటర్ (ఎస్‌జీబీసీ) పరిశోధకులు ప్రపంచంలోనే అత్యంత సూక్ష్మ స్థాయిలో రూపొందించిన త్రిమితీయ (3డీ) మానవ మెదడు కాండం డిజిటల్ అట్లాస్‌ను అభివృద్ధి చేశారు. "యాంకర్" (Atlas of Neurochemical Characterisation of the Human Brainstem with 3D Reconstruction) పేరుతో రూపొందించిన ఈ డిజిటల్ మ్యాప్ న్యూరోసైన్స్ రంగంలో విప్లవాత్మక పురోగతిగా భావిస్తున్నారు. ఈ అట్లాస్ సహాయంతో శాస్త్రవేత్తలు మొత్తం మెదడు ఎంఆర్‌ఐ చిత్రాల నుంచి ఒక్కో నాడీ కణం వరకు అత్యంత స్పష్టంగా పరిశీలించే అవకాశం లభించనుంది. మానవ మెదడు అనేది ప్రపంచంలోనే అత్యంత సంక్లిష్టమైన జీవ అవయవాల్లో ఒకటి. ఇందులో సుమారు 86 బిలియన్ల నాడీ కణాలు (న్యూరాన్లు) ఉంటాయని శాస్త్రవేత్తలు అంచనా వేస్తున్నారు. అయినప్పటికీ ఇప్పటివరకు మెదడులోని అనేక భాగాలు పూర్తిగా అర్థం కాలేదు. అల్జీమర్స్, పార్కిన్సన్స్, మెదడు క్షీణత వంటి వ్యాధులను నిర్ధారించే సమయంలో వైద్యులు సాధారణంగా కొన్ని కణజాల నమూనాలను మాత్రమే పరిశీలిస్తారు. దీంతో మెదడులోని అనేక ప్రాంతాలు ఇంకా పూర్తిస్థాయిలో అధ్యయనం చేయబడలేదు.

ఈ సమస్యను అధిగమించేందుకు ఐఐటీ మద్రాస్‌కు చెందిన పరిశోధకులు అత్యంత సమగ్ర డిజిటల్ మ్యాప్‌ను రూపొందించారు. ఈ ప్రాజెక్టులో గర్భస్థ శిశువు, చిన్నారులు, పెద్దల మెదడు కాండాలకు చెందిన 500కు పైగా కణజాల విభాగాలను పరిశీలించారు. అత్యంత అధిక రిజల్యూషన్ కలిగిన సూక్ష్మదర్శిని చిత్రాలను ఉపయోగించి ప్రతి భాగాన్ని డిజిటల్ రూపంలో నమోదు చేశారు. అనంతరం వాటిని సమగ్రపరచి ఒకే త్రిమితీయ నమూనాగా రూపొందించారు. దీనివల్ల మెదడు కాండంలోని నిర్మాణం, నాడీ కణాల పంపిణీ, వాటి మధ్య అనుసంధానాలను అత్యంత ఖచ్చితంగా అధ్యయనం చేయడం సాధ్యమైంది.

ఈ డిజిటల్ అట్లాస్‌లో 200కు పైగా నాడీ కణ సమూహాలు (సెల్ క్లస్టర్లు) మరియు ముఖ్యమైన నాడీ మార్గాలను గుర్తించారు. గతంలో అందుబాటులో ఉన్న పద్ధతులతో పోలిస్తే ఇది మరింత స్పష్టమైన సమాచారాన్ని అందిస్తుంది. ముఖ్యంగా ఖరీదైన మాలిక్యులర్ సాంకేతికతలపై ఆధారపడకుండా, అధిక నాణ్యత గల సూక్ష్మదర్శిని చిత్రాల ఆధారంగా ఈ అట్లాస్ రూపొందించడం దీని ప్రత్యేకతగా నిలిచింది. దీంతో తక్కువ వ్యయంతో కూడా ప్రపంచస్థాయి న్యూరోసైన్స్ పరిశోధనలు చేసే అవకాశం ఏర్పడింది.