హువావే అధినేత దేశం వీడారా? చైనాలో హాట్‌టాపిక్‌గా మారిన రూమర్లు

చైనాకు చెందిన ప్రముఖ టెక్నాలజీ సంస్థ హువావే వ్యవస్థాపకుడు, సీఈఓ రెన్‌ జెంగ్‌ఫీ దేశం వీడారన్న ప్రచారం ప్రస్తుతం చైనా సోషల్‌ మీడియాతో పాటు అంతర్జాతీయ టెక్నాలజీ వర్గాల్లో చర్చనీయాంశంగా మారింది. కొత్త ప్రయాణ ఆంక్షలు అమల్లోకి రానున్న సమయంలో ఆయన కుటుంబంతో కలిసి దేశం విడిచి వెళ్లారంటూ పలు సోషల్‌ మీడియా పోస్టులు వైరల్‌ అవుతున్నాయి. అయితే ఈ ప్రచారాన్ని ఇప్పటివరకు హువావే సంస్థ గానీ, చైనా అధికారిక వర్గాలు గానీ ధ్రువీకరించలేదు.

రెన్‌ జెంగ్‌ఫీ తన కుటుంబంతో కలిసి సముద్ర మార్గం ద్వారా చైనా నుంచి బయటకు వెళ్లారంటూ సామాజిక మాధ్యమాల్లో విస్తృతంగా చర్చ జరుగుతోంది. కొత్త ఎగ్జిట్‌ కంట్రోల్‌ నిబంధనలు అమల్లోకి రావడానికి కొద్ది రోజుల ముందే ఆయన దేశం విడిచి వెళ్లినట్లు ప్రచారం జరుగుతోంది. షెన్‌జెన్‌లోని హువావే ప్రధాన కార్యాలయం వద్ద పెద్ద సంఖ్యలో పోలీసులు మోహరించారన్న వార్తలు కూడా ఈ ఊహాగానాలకు మరింత బలం చేకూరుస్తున్నాయి.

చైనా ప్రభుత్వం టెక్నాలజీ రంగంపై నియంత్రణను పెంచుతున్న నేపథ్యంలో ఈ ప్రచారం ప్రాధాన్యం సంతరించుకుంది. జాతీయ భద్రత లేదా సాంకేతిక భద్రతకు ముప్పుగా భావించే చైనా పౌరుల విదేశీ ప్రయాణాలపై ఆంక్షలు విధించేలా కొత్త నిబంధనలు తీసుకొస్తున్నట్లు సమాచారం. అలాంటి వ్యక్తులు దేశం విడిచి వెళ్లకుండా అడ్డుకునే అధికారాన్ని సంబంధిత సంస్థలకు ఈ నిబంధనలు కల్పిస్తాయని ప్రచారం జరుగుతోంది. ఈ నిబంధనలు సెప్టెంబర్‌ 15 నుంచి అమల్లోకి రానున్నట్లు పేర్కొంటున్నారు.

ఈ నేపథ్యంలోనే రెన్‌ జెంగ్‌ఫీ దేశం విడిచి వెళ్లారన్న ప్రచారం తెరపైకి రావడం ఆసక్తిని రేకెత్తిస్తోంది. అయితే ఆయన ప్రస్తుతం ఎక్కడ ఉన్నారు, నిజంగానే కుటుంబంతో కలిసి దేశం విడిచి వెళ్లారా, సముద్ర మార్గంలో ప్రయాణించారా అనే అంశాలపై స్పష్టమైన అధికారిక సమాచారం మాత్రం వెలువడలేదు. హువావే ప్రధాన కార్యాలయం వద్ద పోలీసుల మోహరింపునకు కారణం ఏమిటన్న దానిపైనా అధికారిక వివరణ అందుబాటులో లేదు.

గతంలోనూ చైనా ప్రభుత్వ ఒత్తిళ్ల నేపథ్యంలో ప్రముఖ వ్యాపారవేత్తల కదలికలపై అనేక రకాల ఊహాగానాలు వెలువడ్డాయి. అలీబాబా వ్యవస్థాపకుడు జాక్‌ మా కొంతకాలం ప్రజలకు దూరంగా ఉండటం అప్పట్లో ప్రపంచవ్యాప్తంగా చర్చనీయాంశమైంది. ఇప్పుడు హువావే అధినేతపై వస్తున్న ప్రచారం కూడా అదే నేపథ్యంలో టెక్నాలజీ రంగంలో ఆసక్తిని రేకెత్తిస్తోంది. అయితే ప్రస్తుతానికి రెన్‌ జెంగ్‌ఫీ దేశం విడిచారన్న విషయం ధ్రువీకరించని ప్రచారంగానే పరిగణించాల్సి ఉంటుంది.