ట్రంప్‌ మా హామీలనే కాపీ: డీకే

కాంగ్రెస్‌ ప్రభుత్వం అమలు చేస్తున్న హామీలను సమర్థిస్తూ కర్ణాటక ఉప ముఖ్యమంత్రి డీకే శివకుమార్‌ ఆసక్తికర వ్యాఖ్యలు చేశారు. తమ పార్టీ ప్రకటించిన గ్యారంటీలను ఇతర రాష్ట్రాలు అనుసరించాయని, ఇప్పుడు అమెరికా అధ్యక్షుడు డొనాల్డ్‌ ట్రంప్‌ కూడా అదే బాటలో నడుస్తున్నారని ఆయన వ్యాఖ్యానించారు. కాంగ్రెస్‌ ఆలోచనా విధానం భారత్‌కే పరిమితం కాకుండా ప్రపంచవ్యాప్తంగా ప్రభావం చూపుతోందని పేర్కొన్నారు.

మీడియాతో మాట్లాడిన డీకే శివకుమార్‌.. తమ హామీలను మహారాష్ట్ర కాపీ చేసిందని, అనంతరం రాజస్థాన్‌, బిహార్‌ కూడా ఇదే విధానాన్ని అనుసరించాయని చెప్పారు. ఇప్పుడు అమెరికాలోనూ ప్రజలకు నేరుగా ఆర్థిక ప్రయోజనం కల్పించే హామీలు తెరపైకి వస్తున్నాయని అన్నారు. ఇటీవల మధ్యంతర ఎన్నికల్లో రిపబ్లికన్‌ పార్టీ విజయం సాధిస్తే ప్రతి వయోజన అమెరికన్‌కు 5,000 డాలర్లు ఇస్తామని డొనాల్డ్‌ ట్రంప్‌ ప్రకటించిన విషయాన్ని ఆయన ప్రస్తావించారు.

అమెరికా ఆర్థిక వ్యవస్థ బలంగా ఉందని, దేశం సాధించిన ఆర్థిక విజయాల్లో ప్రజలకు కూడా వాటా కల్పించాలనే ఉద్దేశంతో ఈ మొత్తాన్ని అందిస్తామని ట్రంప్‌ చెప్పినట్లు సమాచారం. ఈ మొత్తాన్ని ఆయన డివిడెండ్‌గా అభివర్ణించారు. ప్రజలకు నేరుగా నగదు లేదా ఆర్థిక ప్రయోజనం అందించే విధానాన్ని ఎన్నికల హామీగా ముందుకు తీసుకురావడాన్ని డీకే శివకుమార్‌ కాంగ్రెస్‌ గ్యారంటీలతో పోల్చారు.

తమ పార్టీ ప్రవేశపెట్టిన సంక్షేమ హామీలు ప్రజల్లో ఆదరణ పొందాయని డీకే శివకుమార్‌ పేర్కొన్నారు. అందుకే ఇతర ప్రాంతాల్లోనూ ఇలాంటి పథకాలపై రాజకీయ పార్టీలు దృష్టి సారిస్తున్నాయని అన్నారు. కాంగ్రెస్‌ పార్టీ ఆలోచనా విధానం కేవలం ఒక రాష్ట్రానికో, దేశానికో పరిమితం కాకుండా అంతర్జాతీయ స్థాయిలో చర్చకు వస్తోందని వ్యాఖ్యానించారు. దీనినే కాంగ్రెస్‌ పార్టీ బలంగా ఆయన అభివర్ణించారు.

అయితే అమెరికాలో ప్రతి వయోజనుడికి 5,000 డాలర్ల చెల్లింపు వంటి హామీ అమలుకు భారీ మొత్తంలో నిధులు అవసరమవుతాయని ఆర్థిక వర్గాల్లో చర్చ జరుగుతోంది. ఈ ఆకస్మిక హామీని అమలు చేయాలంటే లక్ష కోట్ల డాలర్లకు పైగా వ్యయం అయ్యే అవకాశం ఉందన్న అంచనాలు కూడా వినిపిస్తున్నాయి. ఈ నేపథ్యంలో ట్రంప్‌ ప్రతిపాదనపై అమెరికా ఆర్థిక విధానం, ప్రభుత్వ వ్యయం, నిధుల సమీకరణ వంటి అంశాలపై కూడా చర్చ మొదలైంది.