బీసీ హాస్టళ్లలో ప్రతి విద్యార్థికి వసతి కల్పించాలి: ఎస్‌ఎఫ్‌ఐ

ఆదోని పట్టణంలోని బీసీ సంక్షేమ హాస్టళ్లలో దరఖాస్తు చేసుకున్న ప్రతి విద్యార్థికి వసతి కల్పించాలని ఎస్‌ఎఫ్‌ఐ నాయకులు డిమాండ్ చేశారు. ఈ మేరకు ఎస్‌ఎఫ్‌ఐ ఆధ్వర్యంలో సహాయ వెనుకబడిన తరగతుల సంక్షేమ శాఖ అధికారి (ఏబీసీడబ్ల్యూఓ) మాదప్పకు వినతిపత్రం అందజేశారు.

ఈ సందర్భంగా ఎస్‌ఎఫ్‌ఐ జిల్లా ఉపాధ్యక్షుడు శ్రీనివాసులు, పట్టణ అధ్యక్షుడు సంజయ్, కార్యదర్శి శశిధర్ మాట్లాడుతూ హాస్టళ్లలో సీట్ల కొరత కారణంగా అనేక మంది పేద విద్యార్థులు ఇబ్బందులు ఎదుర్కొంటున్నారని ఆవేదన వ్యక్తం చేశారు. వసతి సౌకర్యం లేక కొందరు విద్యార్థులు చదువును మధ్యలోనే మానేయాల్సిన పరిస్థితి ఏర్పడుతోందని పేర్కొన్నారు.

ఆదోని, ఆలూరు, మంత్రాలయం నియోజకవర్గాలు వెనుకబడిన ప్రాంతాలు కావడంతో పేద, గ్రామీణ విద్యార్థులకు హాస్టల్ వసతి అత్యంత అవసరమని తెలిపారు. అందువల్ల బీసీ సంక్షేమ హాస్టళ్లకు దరఖాస్తు చేసుకున్న ప్రతి అర్హ విద్యార్థికి సీటు కేటాయించేలా ప్రభుత్వం చర్యలు తీసుకోవాలని కోరారు.

విద్యార్థుల భవిష్యత్తును దృష్టిలో ఉంచుకుని హాస్టళ్లలో వసతులను పెంచడం, సీట్ల సంఖ్యను విస్తరించడం, విద్యాభ్యాసానికి అనుకూల వాతావరణం కల్పించడం అత్యవసరమని ఎస్‌ఎఫ్‌ఐ నాయకులు పేర్కొన్నారు. విద్య హక్కును కాపాడేందుకు ప్రభుత్వం, అధికారులు వెంటనే స్పందించి తగిన చర్యలు చేపట్టాలని వారు డిమాండ్ చేశారు.