అంగన్వాడీ కేంద్రాల్లో పోషకాహార నాణ్యతపై ఎమ్మెల్యే గిత్త తనిఖీ

నందికొట్కూరు నియోజకవర్గంలోని దామగట్ల గ్రామంలో అంగన్వాడీ కేంద్రాలను ఎమ్మెల్యే గిత్త జయసూర్య ఆకస్మికంగా తనిఖీ చేశారు. కేంద్రంలో చిన్నారులకు, గర్భిణీ స్త్రీలకు అందిస్తున్న సేవలు, ఆహార పదార్థాల నాణ్యత, పరిశుభ్రత వంటి అంశాలను పరిశీలించారు. ముఖ్యంగా చిన్నారులకు అందిస్తున్న పోషకాహారాన్ని తనిఖీ చేసి, నాణ్యత ప్రమాణాలు పాటిస్తున్నారా అనే విషయాన్ని అధికారులను అడిగి తెలుసుకున్నారు.

ఈ సందర్భంగా ఎమ్మెల్యే చిన్నారులతో ఆప్యాయంగా మాట్లాడి వారికి అందుతున్న ఆహారం, సౌకర్యాలపై వివరాలు తెలుసుకున్నారు. అంగన్వాడీ కేంద్రంలో పిల్లలకు స్వయంగా బాలామృతం వడ్డించి వారి ఆరోగ్య పరిస్థితుల గురించి ఆరా తీశారు. కేంద్రంలో అందిస్తున్న ఆహారం పిల్లల ఎదుగుదలకు, ఆరోగ్యానికి ఉపయోగపడేలా ఉండాలని సూచించారు.

ముఖ్యమంత్రి నారా చంద్రబాబు నాయుడు ఆదేశాల మేరకు గర్భిణీలు, బాలింతలు, చిన్నారులకు అధిక ప్రోటీన్ విలువలు కలిగిన పోషకాహారం అందించేందుకు ప్రభుత్వం ప్రత్యేక చర్యలు తీసుకుంటోందని ఎమ్మెల్యే గిత్త జయసూర్య తెలిపారు. అంగన్వాడీ కేంద్రాలకు సరఫరా చేసే ఆహార పదార్థాలు అర్హులైన ప్రతి లబ్ధిదారుడికి సక్రమంగా చేరేలా అధికారులు పర్యవేక్షించాలని ఆదేశించారు.

గర్భిణీ స్త్రీలు, చిన్నారులకు పోషక విలువలతో కూడిన ఆహారాన్ని ఉచితంగా అందించడం ప్రభుత్వ ప్రధాన లక్ష్యమని ఆయన పేర్కొన్నారు. పోషకాహార లోపాన్ని నివారించి ఆరోగ్యవంతమైన సమాజ నిర్మాణానికి అంగన్వాడీ కేంద్రాలు కీలక పాత్ర పోషిస్తున్నాయని చెప్పారు. ఎలాంటి అవకతవకలకు అవకాశం లేకుండా నాణ్యమైన ఆహారం అందించాలని అధికారులకు సూచించారు.

ఈ తనిఖీ కార్యక్రమంలో నందికొట్కూరు మండల కన్వీనర్ మాండ్ర సురేంద్రనాథ్ రెడ్డి, ఎమ్మార్వో, ఎంపీడీవో, ఇతర ప్రభుత్వ అధికారులు, గ్రామ నాయకులు తిప్పారెడ్డి, రత్నం తదితరులు పాల్గొన్నారు. అంగన్వాడీ కేంద్రాల పనితీరును మరింత మెరుగుపరచడం ద్వారా చిన్నారులు, గర్భిణీల సంక్షేమాన్ని ప్రభుత్వం మరింత బలోపేతం చేయనున్నట్లు ఎమ్మెల్యే గిత్త జయసూర్య తెలిపారు.