డీఎస్సీ ఉద్యోగాలపై వైసీపీ ఆరోపణలు అబద్ధాలే : మామిడాల మధు

నెల్లూరులో డీఎస్సీ ఉద్యోగాల భర్తీపై వైఎస్సార్ కాంగ్రెస్ పార్టీ నేతలు చేస్తున్న ఆరోపణలు పూర్తిగా అబద్ధాలేనని టీడీపీ నెల్లూరు నగర అధ్యక్షుడు మామిడాల మధు తీవ్రంగా విమర్శించారు. రాజకీయ లబ్ధి కోసమే వైసీపీ నేతలు అసత్య ప్రచారం చేస్తున్నారని ఆయన ఆరోపించారు.

నెల్లూరులో ఏర్పాటు చేసిన మీడియా సమావేశంలో మాట్లాడిన మామిడాల మధు, గత వైసీపీ ప్రభుత్వ హయాంలో ఒక్క టీచర్ ఉద్యోగం కూడా సక్రమంగా ఇవ్వలేకపోయారని విమర్శించారు. అయితే కూటమి ప్రభుత్వం అధికారంలోకి వచ్చిన తర్వాత ముఖ్యమంత్రి నారా చంద్రబాబు నాయుడు మరియు మంత్రి నారా లోకేష్ ఆధ్వర్యంలో 16 వేలకుపైగా ఉద్యోగాలను పారదర్శకంగా భర్తీ చేసినట్లు తెలిపారు.

ఉద్యోగాల భర్తీలో ఎలాంటి అవినీతి జరగలేదని, అర్హత ఉన్న అభ్యర్థులకు ఒక్క రూపాయి కూడా ఖర్చు కాకుండా నియామకాలు జరిగాయని ఆయన పేర్కొన్నారు. కొంతమంది వైసీపీ నేతలు చేస్తున్న ఆరోపణల్లో నిజం లేదని, వాటిని ఖండిస్తున్నామని ఆయన స్పష్టం చేశారు.

అలాగే నెల్లూరు నగర అభివృద్ధిపై కూడా ఆయన స్పందించారు. గత ప్రభుత్వ హయాంలో మైపాడు రోడ్డులో నిర్వాసితుల సమస్యలను పరిష్కరించలేకపోయారని, ప్రస్తుత ప్రభుత్వం చొరవతో స్మార్ట్ స్ట్రీట్ ఏర్పాటు చేసి 120కి పైగా కుటుంబాలకు ఉపాధి కల్పించినట్లు తెలిపారు.

నెల్లూరులో అవినీతికి తావులేకుండా అభివృద్ధి కార్యక్రమాలు కొనసాగుతున్నాయని, ఇకపై కూడా తప్పుడు ప్రచారాలు చేస్తే ప్రజలే బుద్ధి చెబుతారని మామిడాల మధు హెచ్చరించారు. వైసీపీ నేతలు ఇకనైనా అబద్ధాలు మానుకోవాలని ఆయన సూచించారు.