పెద్దకొట్టాల గ్రామంలో బాధిత కుటుంబానికి సీఎం రిలీఫ్ ఫండ్ చెక్కు అందజేసిన మంత్రి ఎన్ఎండి ఫరూక్

నంద్యాల మండలం పెద్దకొట్టాల గ్రామంలో అనారోగ్యంతో ఇబ్బంది పడుతున్న ఓ బాధిత కుటుంబానికి రాష్ట్ర ప్రభుత్వం ముఖ్యమంత్రి సహాయ నిధి (సీఎంఆర్ఎఫ్) ద్వారా ఆర్థిక సహాయం అందజేసింది. ఈ సహాయ చెక్కును రాష్ట్ర మంత్రి ఎన్ఎండి ఫరూక్ స్వయంగా లబ్ధిదారుల ఇంటికి వెళ్లి అందజేశారు.

పెద్దకొట్టాల గ్రామానికి చెందిన అనుపు రెడ్డి ప్రభావతి గారు అనారోగ్య కారణాలతో చికిత్స పొందుతూ ఆర్థిక ఇబ్బందుల్లో ఉన్న నేపథ్యంలో ముఖ్యమంత్రి సహాయ నిధికి దరఖాస్తు చేసుకున్నారు. దరఖాస్తు పరిశీలన అనంతరం ప్రభుత్వం నుంచి సహాయం మంజూరైంది. ఈ సందర్భంగా మంత్రి ఫరూక్ స్వయంగా వారి నివాసానికి వెళ్లి చెక్కును అందజేయడం ప్రత్యేకతగా నిలిచింది.

ప్రోటోకాల్ కంటే ప్రజల పట్ల బాధ్యత ముఖ్యమని భావించి స్వయంగా ఇంటికి వెళ్లి చెక్కు అందజేశానని మంత్రి ఫరూక్ తెలిపారు. పేద ప్రజల సంక్షేమమే ప్రభుత్వ ప్రధాన లక్ష్యమని, వైద్య ఖర్చుల భారంతో ఏ కుటుంబం కూడా ఇబ్బంది పడకూడదని ఆయన స్పష్టం చేశారు.

ప్రభుత్వ పథకాలు అర్హులైన ప్రతి ఒక్కరికీ చేరేలా చర్యలు తీసుకుంటున్నామని మంత్రి పేర్కొన్నారు. నేరుగా మంత్రి తమ ఇంటికి వచ్చి సహాయం అందించడంపై బాధిత కుటుంబ సభ్యులు హర్షం వ్యక్తం చేస్తూ ప్రభుత్వానికి కృతజ్ఞతలు తెలిపారు.

ఈ కార్యక్రమంలో శివనాగిరెడ్డి, పీఏసీఎస్ చైర్మన్ పగిడేల ప్రేమనాథ్ రెడ్డి, నాలి రాజేష్ యాదవ్, నంద్యాల మార్కెట్ యార్డ్ చైర్మన్ గుంటుపల్లి హరిబాబు, నంద్యాల మండల కన్వీనర్ మునగాల విశ్వనాథరెడ్డి, గోస్పాడు మండల కన్వీనర్ తులసీశ్వర్ రెడ్డి, నీటి సంఘాల చైర్మన్ చాబోలు ఇలియాస్ తదితరులు పాల్గొన్నారు.