సాయికృష్ణ కేసులో సీఐ నాగరాజుపై సిట్ ప్రశ్నల వర్షం

విజయవాడలో సంచలనం సృష్టించిన సాయికృష్ణ మిస్సింగ్ కేసు దర్యాప్తు కీలక దశకు చేరుకుంది. ఈ కేసులో ఇప్పటికే పలు కోణాల్లో విచారణ కొనసాగిస్తున్న ప్రత్యేక దర్యాప్తు బృందం అధికారులు తాజాగా సీఐ నాగరాజును సుదీర్ఘంగా విచారిస్తున్నారు. మూడు గంటలకు పైగా కొనసాగుతున్న ఈ విచారణలో సాయికృష్ణ అదృశ్యానికి సంబంధించిన అనేక కీలక అంశాలపై అధికారులు ప్రశ్నలు సంధించినట్లు సమాచారం. ముఖ్యంగా సాయికృష్ణ అరెస్టుకు సంబంధించిన తేదీలు, అతడిని అదుపులోకి తీసుకున్న పరిస్థితులు, అనంతరం జరిగిన పరిణామాలపై స్పష్టత కోసం సిట్ అధికారులు ఆరా తీస్తున్నారు.

దర్యాప్తులో భాగంగా టాస్క్‌ఫోర్స్ సిబ్బంది పాత్రపై కూడా అధికారులు ప్రత్యేక దృష్టి సారించారు. సాయికృష్ణను ఎప్పుడు, ఎక్కడ, ఎలాంటి పరిస్థితుల్లో అదుపులోకి తీసుకున్నారనే విషయాలపై వివరాలు కోరుతున్నట్లు తెలుస్తోంది. అదేవిధంగా అధికారిక పోలీసు వాహనాల బదులు ప్రైవేట్ వాహనాల్లో తరలించినట్లు వచ్చిన ఆరోపణలపై కూడా సిట్ ప్రశ్నలు సంధిస్తోంది. ఈ వ్యవహారంలో విధి నిర్వహణలో నిబంధనలు పాటించారా లేదా అన్న కోణంలో విచారణ కొనసాగుతోంది.

అయితే సిట్ అధికారులు అడుగుతున్న పలు ప్రశ్నలకు సీఐ నాగరాజు స్పష్టమైన సమాధానాలు ఇవ్వకుండా దాటవేస్తున్నట్లు సమాచారం. కొన్ని కీలక ప్రశ్నలకు ప్రత్యక్ష సమాధానాలు చెప్పకుండా వివరణలు మారుస్తున్నారని దర్యాప్తు వర్గాలు చెబుతున్నాయి. దీంతో ఈ విచారణ మరింత ప్రాధాన్యత సంతరించుకుంది. సాయికృష్ణ అదృశ్యానికి ముందు, తర్వాత జరిగిన ప్రతి పరిణామాన్ని నిశితంగా పరిశీలిస్తున్న సిట్ అధికారులు అందుబాటులో ఉన్న రికార్డులు, కాల్ డేటా, వాహనాల కదలికలు, సంబంధిత అధికారుల వాంగ్మూలాలను కూడా సమీకరిస్తున్నారు.

ఈ కేసులో నిజానిజాలను వెలికితీయాలనే లక్ష్యంతో సిట్ వేగంగా దర్యాప్తు కొనసాగిస్తుండగా, సీఐ నాగరాజు విచారణలో వెలుగులోకి వచ్చే అంశాలు కేసు దిశను ప్రభావితం చేసే అవకాశముందని భావిస్తున్నారు. రాష్ట్రవ్యాప్తంగా చర్చనీయాంశంగా మారిన ఈ కేసులో సిట్ తదుపరి చర్యలపై ఆసక్తి నెలకొంది.