10వ తరగతి టాపర్లకు ఎమ్మెల్యే శ్రీ బేబీనాయన సత్కారం

బొబ్బిలి నియోజకవర్గంలో 10వ తరగతి పరీక్షల్లో అత్యుత్తమ ప్రతిభ కనబరిచిన ప్రభుత్వ పాఠశాల విద్యార్థులను గౌరవ శాసనసభ్యులు శ్రీ ఆర్.వి.ఎస్.కె.కె. రంగారావు (బేబీనాయన) ఘనంగా సత్కరించారు. “మై ఫంక్షన్ హాల్”లో జరిగిన ఈ ప్రత్యేక కార్యక్రమంలో 580 పైగా మార్కులు సాధించిన 27 మంది విద్యార్థులు, వారి తల్లిదండ్రులు, ఉపాధ్యాయులు, విద్యాశాఖ అధికారులు పాల్గొన్నారు. విద్యార్థుల విజయాలను గుర్తించి వారిని ప్రోత్సహించే లక్ష్యంతో ఈ కార్యక్రమాన్ని నిర్వహించారు.

ఈ సందర్భంగా ఎమ్మెల్యే బేబీనాయన మాట్లాడుతూ ప్రభుత్వ పాఠశాలల్లో చదివి అత్యుత్తమ ఫలితాలు సాధించడం గర్వకారణమని అన్నారు. విద్యార్థుల కృషి, ఉపాధ్యాయుల శ్రమ, తల్లిదండ్రుల సహకారం కలిసే ఈ విజయాలు సాధ్యమవుతున్నాయని ఆయన పేర్కొన్నారు. ప్రభుత్వ పాఠశాలల అభివృద్ధి కోసం కూటమి ప్రభుత్వం ప్రత్యేకంగా కృషి చేస్తోందని తెలిపారు.

విద్యాశాఖ మంత్రి నారా లోకేష్ తీసుకొచ్చిన సంస్కరణల వల్ల ప్రభుత్వ పాఠశాలల స్థాయి గణనీయంగా మెరుగుపడిందని ఎమ్మెల్యే బేబీనాయన అభిప్రాయపడ్డారు. పాఠశాల నిర్వహణ, బోధనా విధానం, విద్యార్థుల ప్రోత్సాహం వంటి అంశాల్లో కొత్త మార్పులు తీసుకురావడం వల్లే మంచి ఫలితాలు వస్తున్నాయని ఆయన అన్నారు.

జిల్లా విద్యాశాఖ అధికారి మాణిక్యం నాయుడు మాట్లాడుతూ ఎమ్మెల్యే బేబీనాయన విద్యార్థులతో కలిసి వారి విజయాలను జరుపుకోవడం అభినందనీయమని అన్నారు. విద్యార్థులు ఉన్నత చదువుల్లో కూడా ఇదే విధంగా రాణించాలని సూచించారు. ఉపాధ్యాయుల కృషిని కూడా ఆయన ప్రశంసించారు.

ఈ కార్యక్రమంలో డిప్యూటీ DEO కె.ఎం.రావు, MEOలు, హెడ్ మాస్టర్లు, టీడీపీ నాయకులు పాల్గొన్నారు. 540 పైగా మార్కులు సాధించిన 224 మంది విద్యార్థులు ఉండటం నియోజకవర్గానికి గర్వకారణమని అధికారులు తెలిపారు.

ఎమ్మెల్యే బేబీనాయన విద్యార్థులకు స్వయంగా భోజనం వడ్డించి వారిని ప్రోత్సహించడం కార్యక్రమానికి ప్రత్యేక ఆకర్షణగా నిలిచింది. విద్యార్థులు ఇదే క్రమంలో కష్టపడి చదివి ఉన్నత స్థానాలకు చేరుకోవాలని ఆయన ఆకాంక్షించారు.