బనగానపల్లెలో VOAలకు 5G స్మార్ట్‌ఫోన్లు పంపిణీ..

డ్వాక్రా సంఘాల (ఎస్‌హెచ్‌జీ) మహిళల సాధికారతను పెంపొందించడంతో పాటు సాంకేతికతను గ్రామ స్థాయికి తీసుకెళ్లే లక్ష్యంతో బనగానపల్లెలో గ్రామ సంఘాల సహాయకులకు (వీఓఏ) 5G స్మార్ట్‌ఫోన్లు పంపిణీ చేశారు. ఈ కార్యక్రమాన్ని మంత్రి బీసీ జనార్దన్ రెడ్డి నిర్వహించారు.

డ్వాక్రా సంఘాల రికార్డులను డిజిటలైజ్ చేయడం, పొదుపు రుణాల వివరాలను వేగంగా నిర్వహించడం, ప్రభుత్వ పథకాల సమాచారాన్ని సమర్థవంతంగా చేరవేయడం కోసం ఈ స్మార్ట్‌ఫోన్లు ఉపయోగపడతాయని ప్రభుత్వం పేర్కొంది. ముఖ్యమంత్రి చంద్రబాబు నాయుడు నేతృత్వంలోని కూటమి ప్రభుత్వం ఈ నిర్ణయం తీసుకున్నట్లు తెలిపారు.

ఈ సందర్భంగా మంత్రి బీసీ జనార్దన్ రెడ్డి మాట్లాడుతూ, సుమారు 178 మంది బుక్ కీపర్లకు మొబైల్ ఫోన్లు పంపిణీ చేశామని, మిగిలిన 53 మందికి కూడా త్వరలో అందజేస్తామని చెప్పారు. టెక్నాలజీలో జరుగుతున్న విప్లవాత్మక మార్పులను గ్రామ స్థాయిలో అమలు చేయాలనే ఉద్దేశంతోనే ఈ కార్యక్రమం చేపట్టినట్లు తెలిపారు.

ఇంట్లో కూర్చునే మొత్తం వ్యవస్థను మొబైల్ ద్వారా నిర్వహించే పరిస్థితి ఇప్పుడు ఏర్పడిందని, ఆ దిశగా గ్రామ సంఘాల సహాయకులను సిద్ధం చేయడమే లక్ష్యమని మంత్రి పేర్కొన్నారు. గత ప్రభుత్వంలో ఇలాంటి సాంకేతిక చొరవ కనిపించలేదని ఆయన విమర్శించారు.

డ్వాక్రా మహిళా సంఘాలు ముఖ్యమంత్రి చంద్రబాబు నాయుడు “మానస పుత్రికలు” అని ఆయన అభివర్ణించారు. ప్రభుత్వం ఆర్థిక ఇబ్బందులు ఉన్నప్పటికీ 15 నుండి 20 వేల రూపాయల విలువైన ఫోన్లను అందించడం ద్వారా మహిళా సంఘాల పనితీరును మెరుగుపరచాలని లక్ష్యంగా పెట్టుకుందని తెలిపారు.

బుక్ కీపర్లు ఈ సాంకేతికతను సద్వినియోగం చేసుకుని ప్రజలకు మరింత సమర్థవంతమైన సేవలు అందించాలని మంత్రి సూచించారు.