మద్దిపాడులో కంటైనర్ బోల్తా..

మద్దిపాడు: మండల పరిధిలోని 16వ నంబర్ జాతీయ రహదారిపై వెంకటరాజుపాలెం వద్ద కార్లను రవాణా చేస్తున్న కంటైనర్ అదుపుతప్పి బోల్తా పడింది. ఈ ప్రమాదంలో కంటైనర్ డ్రైవర్ నితీష్ యాదవ్‌కు గాయాలయ్యాయి. హైవే మొబైల్ పోలీసులు తెలిపిన వివరాల ప్రకారం.. ఆదివారం చెన్నై నుంచి నాగాలాండ్‌కు కార్ల లోడ్‌తో కంటైనర్ బయలుదేరింది.

వెంకటరాజుపాలెం సమీపానికి చేరుకున్న సమయంలో కంటైనర్ అదుపుతప్పి రహదారిపై బోల్తా పడింది. ప్రమాదం జరిగిన వెంటనే స్థానికులు స్పందించి పోలీసులకు, అత్యవసర సేవల సిబ్బందికి సమాచారం అందించారు. ప్రమాదంలో గాయపడిన డ్రైవర్ నితీష్ యాదవ్‌ను 108 అత్యవసర వాహనంలో ఒంగోలు రిమ్స్ వైద్యశాలకు తరలించారు.

కంటైనర్‌లో కార్ల లోడ్ ఉండటంతో ప్రమాదం జరిగిన ప్రాంతంలో కొంతసేపు ఆందోళనకర పరిస్థితి నెలకొంది. అయితే డ్రైవర్‌కు గాయాలు కావడం మినహా ఇతరులకు ఎలాంటి ప్రమాదం జరిగినట్లు సమాచారం లేదు. ప్రమాదానికి సంబంధించిన వివరాలను హైవే మొబైల్ పోలీసులు నమోదు చేశారు.

ప్రాథమికంగా డ్రైవర్ నిద్రమత్తులో ఉండటమే ప్రమాదానికి కారణమై ఉండొచ్చని పోలీసులు భావిస్తున్నారు. నిద్రమత్తు కారణంగా వాహనంపై నియంత్రణ కోల్పోయి కంటైనర్ బోల్తా పడినట్లు ప్రాథమికంగా అంచనా వేస్తున్నారు. ఘటనపై పోలీసులు మరిన్ని వివరాలను సేకరిస్తున్నారు.