ఎలుగుబంటి దాడుల భయం.. జపాన్‌లో ప్రత్యేక శిక్షణ విన్యాసాలు

13 మంది ప్రాణాలు కోల్పోయినట్లు అధికారిక గణాంకాలు వెల్లడించాయి. ఈ నేపథ్యంలో ప్రజల భద్రత కోసం టోచిగి ప్రిఫెక్చర్ అధికారులు అత్యవసర ప్రతిస్పందన విన్యాసాలు చేపట్టారు.

ఎలుగుబంటి కనిపించినప్పుడు ఎలా స్పందించాలి, ప్రమాదాన్ని ఎలా అంచనా వేయాలి, ప్రజలను ఎలా రక్షించాలి అనే అంశాలపై ఈ శిక్షణలు నిర్వహించారు. స్థానిక పోలీసులు, అనుమతి పొందిన వేటగాళ్లు, అటవీ శాఖ సిబ్బంది, ప్రభుత్వ అధికారులు ఈ కార్యక్రమంలో పాల్గొన్నారు. అడవి ఎలుగుబంటిని గుర్తించడం, మత్తు మందు ఉపయోగించి అదుపులోకి తీసుకోవడం, ఎలుగుబంటి నిరోధక స్ప్రే వినియోగించడం వంటి అంశాలను ప్రాక్టికల్‌గా ప్రదర్శించారు.

టోచిగి వన్యప్రాణుల నియంత్రణ విభాగం అధికారులు తెలిపిన వివరాల ప్రకారం, నిజ జీవితంలో ఎలుగుబంటి గ్రామాలు లేదా జనావాసాల్లోకి ప్రవేశించిన పరిస్థితులను దృష్టిలో పెట్టుకుని ఈ విన్యాసాలు నిర్వహించారు. అత్యవసర సమయంలో అధికారులు సమన్వయంతో పనిచేయడానికి ఇవి ఉపయోగపడతాయని పేర్కొన్నారు.

జపాన్‌లో ఇటీవల అడవి ప్రాంతాలు, నివాస ప్రాంతాల మధ్య దూరం తగ్గిపోవడం, ఆహారం కోసం వన్యప్రాణులు జనావాసాల్లోకి రావడం వంటి కారణాలతో ఎలుగుబంటి దాడులు పెరుగుతున్నాయని నిపుణులు చెబుతున్నారు. దీంతో ప్రజలను అప్రమత్తం చేయడం, అత్యవసర ప్రతిస్పందన వ్యవస్థను బలోపేతం చేయడం ప్రభుత్వానికి ప్రాధాన్య అంశంగా మారింది.

ప్రస్తుతం జపాన్‌లోని పలు ప్రాంతాల్లో ఇలాంటి శిక్షణ కార్యక్రమాలు కొనసాగుతున్నాయి. ప్రజల ప్రాణాలను రక్షించడంతో పాటు వన్యప్రాణులకు హాని కలగకుండా పరిస్థితులను నియంత్రించడం ఈ కార్యక్రమాల ప్రధాన లక్ష్యంగా అధికారులు పేర్కొన్నారు.