ఏఐ పేరుతో మోసం.. ఉద్యోగ కోతల వెనుక అసలు కథ

ప్రపంచవ్యాప్తంగా కృత్రిమ మేధస్సు ప్రభావం పెరుగుతున్న నేపథ్యంలో కొత్తగా “ఏఐ వాషింగ్” అనే ధోరణి ఆందోళన కలిగిస్తోంది. కంపెనీలు తమ ఉత్పత్తులు, సేవలు లేదా వ్యాపార నిర్ణయాలకు ఏఐని అతిశయోక్తిగా జోడించి ప్రచారం చేయడాన్ని ఏఐ వాషింగ్‌గా పిలుస్తున్నారు. కొంతమంది సంస్థలు నిజంగా ఏఐ వినియోగం తక్కువగా ఉన్నప్పటికీ “ఏఐ ఆధారిత” అనే ముద్రతో వినియోగదారులను, పెట్టుబడిదారులను ఆకర్షించేందుకు ప్రయత్నిస్తున్నాయని నిపుణులు హెచ్చరిస్తున్నారు  ఇటీవల మరో పెద్ద చర్చ ఉద్యోగ కోతల విషయంలో కనిపిస్తోంది. అనేక సంస్థలు ఉద్యోగులను తొలగించడానికి ఏఐని కారణంగా చూపుతున్నప్పటికీ, కొందరు ఆర్థిక విశ్లేషకులు దీనిని సందేహంతో చూస్తున్నారు. 2025లో వేలాది ఉద్యోగ కోతలకు ఏఐ కారణమని పేర్కొన్నప్పటికీ, వాస్తవానికి అధిక నియామకాలు, వ్యాపార పునర్వ్యవస్థీకరణ, లాభాల పెంపు వంటి కారణాలు కూడా ఉండవచ్చని పరిశోధకులు చెబుతున్నారు. ఈ ధోరణినే “ఏఐ వాషింగ్”లో భాగంగా కొందరు అభివర్ణిస్తున్నారు. సాంకేతిక రంగంలో ఏఐ శక్తివంతమైన సాధనం అయినప్పటికీ, ప్రతి ఉద్యోగాన్ని వెంటనే భర్తీ చేయగల స్థాయికి ఇంకా చేరలేదని నిపుణులు అంటున్నారు. అనేక కంపెనీలు ఏఐ వల్ల సామర్థ్యం పెరుగుతుందని చెబుతున్నా, వాస్తవంగా మనుషుల పనిని పూర్తిగా భర్తీ చేసే పరిణతి చెందిన వ్యవస్థలు చాలా రంగాల్లో ఇంకా అందుబాటులో లేవని విశ్లేషణలు సూచిస్తున్నాయి.