సముద్రంలో కూలిన విమానం.. రెక్కపై కూర్చుని ప్రాణాలు దక్కించుక

బ్రిటన్‌లోని వేల్స్ తీరంలో జరిగిన విమాన ప్రమాదం ఉత్కంఠ రేపింది. చిన్న మైక్రోలైట్ విమానం అత్యవసర పరిస్థితుల్లో సముద్రంలో కూలిపోవడంతో అందులో ఉన్న ఇద్దరు ప్రయాణికులు విమానం రెక్కపై కూర్చొని సహాయం కోసం వేచి చూశారు. ఈ దృశ్యాలు సామాజిక మాధ్యమాల్లో వైరల్‌గా మారాయి. ఘటన వేల్స్‌లోని కార్డిగన్ బే సమీపంలో, కార్డిగన్ దీవికి సమీపంలో చోటుచేసుకుంది.

సమాచారం అందుకున్న వెంటనే తీర రక్షక దళం, ఆర్‌ఎన్‌ఎల్‌ఐ లైఫ్‌బోట్లు, కోస్ట్‌గార్డ్ హెలికాప్టర్ సంయుక్తంగా సహాయక చర్యలు చేపట్టాయి. సముద్రంలో తేలియాడుతున్న విమానం రెక్కపై కూర్చున్న ఇద్దరినీ సురక్షితంగా బయటకు తీసుకొచ్చి వైద్య సిబ్బందికి అప్పగించారు. చల్లని నీటిలో కొంతసేపు ఉండటంతో వారికి స్వల్ప అస్వస్థత ఏర్పడినప్పటికీ, ప్రాణాపాయం లేదని అధికారులు తెలిపారు

ప్రాథమిక సమాచారం ప్రకారం, విమానంలో సాంకేతిక లోపం తలెత్తడంతో పైలట్ అత్యవసరంగా సముద్రంలో దింపే ప్రయత్నం చేసినట్లు తెలుస్తోంది. ప్రమాదానికి గల ఖచ్చితమైన కారణాలపై సంబంధిత అధికారులు దర్యాప్తు ప్రారంభించారు. ప్రమాదం జరిగిన ప్రాంతంలో నౌకాయానానికి కూడా హెచ్చరికలు జారీ చేసినట్లు సమాచారం.

సహాయక బృందాల వేగవంతమైన స్పందన వల్లే ఇద్దరి ప్రాణాలు కాపాడగలిగామని అధికారులు తెలిపారు. ప్రమాదం అనంతరం విమానం రెక్కపై ప్రశాంతంగా కూర్చొని సహాయక బృందాల కోసం వేచి ఉన్న ప్రయాణికుల దృశ్యాలు ప్రస్తుతం ప్రపంచవ్యాప్తంగా చర్చనీయాంశంగా మారాయి.