అచ్చంపేటలో మొదలుపెట్టాం.. తెలంగాణ అంతా వెళ్లాలనేది నా డ్రీమ్: విజయ్ దేవరకొండ

వివాహం అనంతరం ఉత్తమ మార్కులు సాధించిన విద్యార్థులకు మెరిట్ స్కాలర్‌షిప్ ఇస్తామని సినీ నటుడు విజయ్ దేవరకొండ ప్రకటించారు. ఇచ్చిన మాట ప్రకారం అచ్చంపేట డివిజన్ పరిధిలోని 44 ప్రభుత్వ పాఠశాలల్లో 9వ, 10వ తరగతి పరీక్షల్లో ఫస్ట్, సెకండ్ ర్యాంకులు సాధించిన విద్యార్థుల జాబితాను ఆయన విడుదల చేశారు.

ది దేవరకొండ ఫౌండేషన్ ఆధ్వర్యంలో ఈ కార్యక్రమాన్ని అమలు చేస్తున్నట్లు తెలిపారు. ప్రభుత్వ పాఠశాలల్లో చదువుతున్న ప్రతిభావంతులైన విద్యార్థులను ప్రోత్సహించడం ద్వారా వారి భవిష్యత్తుకు బలమైన మద్దతు ఇవ్వాలనే లక్ష్యంతో ఈ స్కాలర్‌షిప్ పథకాన్ని కొనసాగిస్తున్నట్లు పేర్కొన్నారు.

అచ్చంపేట డివిజన్ పరిధిలోని పాఠశాలల విద్యార్థుల ప్రతిభను గుర్తించి వారికి ప్రోత్సాహం ఇవ్వడం ద్వారా చదువులో మరింత పోటీ తత్వం పెంపొందుతుందని నిర్వాహకులు అభిప్రాయపడ్డారు. విద్యార్థులు మరింత శ్రద్ధతో చదువుకోవాలని ఈ కార్యక్రమం ప్రేరణగా నిలుస్తుందని తెలిపారు.

ఈ కార్యక్రమంపై స్థానిక విద్యార్థులు, ఉపాధ్యాయులు హర్షం వ్యక్తం చేశారు. ప్రభుత్వ పాఠశాలల విద్యార్థులకు ఇలాంటి ప్రోత్సాహకాలు అందడం మంచి పరిణామమని అభిప్రాయపడ్డారు.