8 వేల ఏళ్ల నాటి మహిళల చరిత్రను వెలికితీసిన యూఏఈ మ్యూజియం

యునైటెడ్ అరబ్ ఎమిరేట్స్‌లోని జాయెద్ నేషనల్ మ్యూజియం మహిళల చరిత్రకు కొత్త కోణాన్ని పరిచయం చేస్తూ 'విమెన్ ఆఫ్ ది నేషన్' ప్రత్యేక పర్యటనను ప్రారంభించింది. ఈ ప్రదర్శనలో సుమారు 8 వేల ఏళ్ల క్రితం నాటి పురావస్తు ఆధారాల నుంచి ఆధునిక యూఏఈ నిర్మాణంలో మహిళల పాత్ర వరకు విస్తృతంగా వివరిస్తున్నారు. అబుదాబి సమీపంలోని మారవా దీవిలో లభించిన అత్యంత ప్రాచీన సమాధి అవశేషాలు ఈ ప్రదర్శనకు ప్రధాన ఆకర్షణగా నిలుస్తున్నాయి. ఆ సమాధిలో లభించిన మహిళ అస్థిపంజరం, ఈకల అలంకరణలు, షార్క్ పళ్లతో తయారైన ఆభరణాలు, ప్రత్యేక రాతి పనిముట్లు అప్పటి మహిళల సామాజిక స్థానం, నైపుణ్యం, జీవన విధానంపై విలువైన సమాచారాన్ని అందిస్తున్నాయి. ఈ ప్రదర్శన ద్వారా మహిళలు కేవలం కుటుంబ నిర్వహణకే పరిమితం కాకుండా సమాజ నిర్మాణం, సంప్రదాయాల పరిరక్షణ, జ్ఞాన వారసత్వం కొనసాగింపులో కీలక పాత్ర పోషించారని మ్యూజియం వివరిస్తోంది. ఈ ప్రత్యేక టూర్ సందర్శకులకు యూఏఈ చరిత్రను మహిళల దృష్టికోణంలో అర్థం చేసుకునే అవకాశాన్ని కల్పిస్తూ, ప్రాచీన నాగరికత నుంచి నేటి దేశాభివృద్ధి వరకు వారి సేవలను వెలుగులోకి తీసుకొస్తోంది.