డబుల్ బెడ్‌రూం ఇళ్ల కేటాయింపులో తెలంగాణ సర్కార్ కొత్త నిర్ణయం

గ్రేటర్ హైదరాబాద్ పరిధిలోని డబుల్ బెడ్‌రూం ఇళ్ల కేటాయింపుల విషయంలో తెలంగాణ ప్రభుత్వం కీలక నిర్ణయం తీసుకుంది. ఇప్పటికే నిర్మాణం పూర్తైనప్పటికీ ఖాళీగా ఉన్న లేదా లబ్ధిదారులు నివాసం ఉండని ఇళ్లను కొత్త అర్హులకు కేటాయించేందుకు చర్యలు ప్రారంభించింది. హైదరాబాద్, రంగారెడ్డి, మేడ్చల్ జిల్లాల్లో సుమారు 15 వేల ఇళ్లు అందుబాటులో ఉన్నట్లు అధికారులు గుర్తించారు. ఈ గృహ సముదాయాలకు ఐదు కిలోమీటర్ల పరిధిలో నివసించే పేద కుటుంబాలకు ప్రాధాన్యత ఇవ్వాలని ప్రభుత్వం నిర్ణయించింది. సొంత ఇల్లు లేకపోవడం, గతంలో ప్రభుత్వ గృహ పథకాల ద్వారా లబ్ధి పొందకపోవడం వంటి అంశాలను అర్హత ప్రమాణాలుగా పరిగణించనున్నారు. ఇప్పటికే ఉన్న ఎల్-2 జాబితాలోని అభ్యర్థులకు కూడా ప్రాధాన్యం కల్పించే అవకాశముంది. మరోవైపు కేటాయించిన ఇళ్లలో నివాసం ఉండని లబ్ధిదారులకు తుది నోటీసులు జారీ చేసి, స్పందించని వారి కేటాయింపులను రద్దు చేయాలని అధికారులు నిర్ణయించారు. మేడ్చల్ జిల్లా గండిమైసమ్మ, దుండిగల్ ఫేజ్-2 ప్రాంతాల్లో నిర్మాణంలో ఉన్న 6 వేలకుపైగా ఇళ్లను ఈ నెలాఖరులోపు పూర్తి చేయాలని ఆదేశాలు జారీ అయ్యాయి. డబుల్ బెడ్‌రూం కాలనీల్లో మినీ రైతు బజార్లు, షాపింగ్ కాంప్లెక్సులు, రేషన్ కేంద్రాలు వంటి సౌకర్యాలను ఏర్పాటు చేయాలని ప్రభుత్వం ప్రణాళికలు సిద్ధం చేస్తోంది. అలాగే హౌసింగ్ బోర్డు భూముల రక్షణ కోసం రాష్ట్రవ్యాప్తంగా ఆస్తుల వివరాల సేకరణ చేపట్టింది. భూముల ఆక్రమణలను అరికట్టి ప్రభుత్వ ఆస్తులను కాపాడడమే లక్ష్యంగా ఈ చర్యలు కొనసాగుతున్నాయి. దీంతో అర్హులైన పేద కుటుంబాలకు ఇళ్ల కేటాయింపు ప్రక్రియ మరింత వేగవంతం కానుంది.