సియాపై రెండు కుటుంబాల ఆగ్రహం.. నమ్మకం ఎక్కడ పోయింది?

పుణేలో సంచలనం సృష్టించిన కేతన్ అగర్వాల్ హత్య కేసులో ప్రధాన నిందితురాలిగా ఆరోపణలు ఎదుర్కొంటున్న సియా గోయల్‌పై ఇప్పుడు కేతన్, చేతన్ కుటుంబాలు రెండూ తీవ్ర ఆగ్రహం వ్యక్తం చేస్తున్నాయి. ఒకవైపు కేతన్ కుటుంబం “ఆమెను పూర్తిగా నమ్మాం” అని చెబుతుండగా, మరోవైపు చేతన్ కుటుంబం “ఆమె పేరు కూడా మాకు తెలియదు” అంటూ తమ కుమారుడిని ఈ కేసులో బలిపశువుగా మారుస్తున్నారని ఆరోపిస్తోంది కేతన్ కుటుంబ సభ్యుల ప్రకారం, సియా గోయల్‌తో తమకు చాలా కాలంగా పరిచయం ఉండేది. నిశ్చితార్థం తర్వాత పెళ్లి ఏర్పాట్లు ఘనంగా జరుగుతున్నాయని, కుటుంబ సభ్యులందరూ ఆనందంగా ఉన్న సమయంలో ఈ ఘటన జరగడం తమను తీవ్రంగా కలిచివేసిందని వారు చెబుతున్నారు. సియాకు పెళ్లి ఇష్టం లేకపోతే ముందుగానే తిరస్కరించవచ్చని, కానీ ఇంత దారుణమైన మార్గాన్ని ఎందుకు ఎంచుకుందో అర్థం కావడం లేదని కేతన్ తండ్రి ప్రశ్నించారు. ఇక చేతన్ చౌధరీ కుటుంబం మాత్రం పూర్తిగా భిన్నమైన వాదన వినిపిస్తోంది. చేతన్ తండ్రి మాట్లాడుతూ, తన కుమారుడు నిర్దోషి అని, అతడిని ఈ కేసులో అన్యాయంగా ఇరికిస్తున్నారని ఆరోపించారు. సియా గురించి తమకు ముందుగా ఎలాంటి పరిచయం లేదని, ఆమె పేరు కూడా ఎప్పుడూ వినలేదని పేర్కొన్నారు. చేతన్‌ను “బలిపశువుగా” మార్చే ప్రయత్నం జరుగుతోందని ఆయన ఆరోపించారు. పోలీసుల దర్యాప్తు ప్రకారం, సియా గోయల్ మరియు చేతన్ చౌధరీ మధ్య సన్నిహిత సంబంధం ఏర్పడిందని, కేతన్ అగర్వాల్‌ను తమ సంబంధానికి అడ్డంకిగా భావించినట్లు అనుమానిస్తున్నారు. లోహగడ్ కోట వద్ద జరిగిన ఘటన మొదట ప్రమాదంగా కనిపించినప్పటికీ, సీసీటీవీ దృశ్యాలు, కాల్ రికార్డులు, డిజిటల్ ఆధారాల ఆధారంగా ఇది ముందస్తు ప్రణాళికతో జరిగిన నేరమై ఉండవచ్చని దర్యాప్తు అధికారులు భావిస్తున్నారు.