ఆన్‌లైన్ గేమింగ్ అథారిటీ ఏర్పాటు.. కేంద్రం గెజిట్ విడుదల

ఆన్‌లైన్ గేమింగ్ రంగంపై నియంత్రణ, పర్యవేక్షణను మరింత బలోపేతం చేయడానికి కేంద్ర ప్రభుత్వం కీలక నిర్ణయం తీసుకుంది. ఈ మేరకు ‘ఆన్‌లైన్ గేమింగ్ అథారిటీ ఆఫ్ ఇండియా’ పేరుతో కొత్త సంస్థను ఏర్పాటు చేస్తూ గెజిట్ నోటిఫికేషన్ విడుదల చేసింది.

ఎలక్ట్రానిక్స్ మరియు సమాచార సాంకేతిక మంత్రిత్వ శాఖ ఆధ్వర్యంలో ఈ అథారిటీని ఏర్పాటు చేశారు. మొత్తం ఆరుగురు అధికారులతో ఈ సంస్థ పనిచేయనుంది.

ఈ అథారిటీకి ఛైర్మన్‌గా కేంద్ర ఎలక్ట్రానిక్స్, ఐటీ శాఖ అదనపు కార్యదర్శిని నియమించారు. ఆన్‌లైన్ గేమింగ్ రంగంలో నియంత్రణ, విధాన అమలు, పర్యవేక్షణ వంటి కీలక బాధ్యతలు ఈ సంస్థ పరిధిలోకి వస్తాయి.

ఎక్స్ అఫీషియో సభ్యులుగా పలు కీలక శాఖల సంయుక్త కార్యదర్శులు ఇందులో భాగమయ్యారు. వీరిలో హోంశాఖ, ఆర్థిక వ్యవహారాల శాఖ, సమాచార మరియు ప్రసారశాఖ, యువజన మరియు క్రీడల మంత్రిత్వ శాఖ, న్యాయశాఖ ప్రతినిధులు ఉన్నారు.

ఆన్‌లైన్ గేమింగ్ వేగంగా విస్తరిస్తున్న నేపథ్యంలో వినియోగదారుల భద్రత, ఆర్థిక లావాదేవీల నియంత్రణ, మోసాలను అరికట్టడం వంటి అంశాలపై దృష్టి పెట్టేందుకు ఈ అథారిటీ ఏర్పాటు చేసినట్లు తెలుస్తోంది.

ఇకపై దేశవ్యాప్తంగా ఆన్‌లైన్ గేమింగ్ కంపెనీలపై ఒకే కేంద్ర సంస్థ ద్వారా నియంత్రణ, మార్గదర్శకాలు అమలు చేయనున్నారు. దీంతో పారదర్శకత పెరగడంతో పాటు వినియోగదారుల రక్షణ మరింత బలపడుతుందని అధికారులు భావిస్తున్నారు.

మొత్తం మీద ఆన్‌లైన్ గేమింగ్ రంగాన్ని క్రమబద్ధీకరించేందుకు కేంద్రం తీసుకున్న ఈ నిర్ణయం డిజిటల్ రంగ నియంత్రణలో ఒక ముఖ్యమైన ముందడుగుగా నిలుస్తోంది.