ఓటరు జాబితా పటిష్ఠతే ప్రజాస్వామ్యానికి శ్రీరామరక్ష: ఎమ్మెల్యే తంగిరాల సౌమ్య

ఓటరు జాబితా పటిష్ఠతే ప్రజాస్వామ్యానికి శ్రీరామరక్ష అని ఆంధ్రప్రదేశ్ ప్రభుత్వ విప్, నందిగామ ఎమ్మెల్యే తంగిరాల సౌమ్య పేర్కొన్నారు. నందిగామలోని బాబు జగజ్జీవన్ రామ్ భవన్‌లో నిర్వహించిన ప్రత్యేక సమగ్ర సవరణ (ఎస్‌ఐఆర్) వర్క్‌షాప్‌లో ఆమె పాల్గొని బూత్ స్థాయి ఇన్‌చార్జిలు, క్లస్టర్, యూనిట్ కన్వీనర్లకు దిశానిర్దేశం చేశారు. ఓటరు జాబితా సవరణ, కొత్త ఓటర్ల నమోదు, మరణించిన వారి పేర్ల తొలగింపు, చిరునామా మార్పుల అప్‌డేట్ వంటి అంశాలపై సమగ్రంగా చర్చించారు.

ప్రతి అర్హుడికి ఓటు హక్కు కల్పించడం, అనర్హుల పేర్లను తొలగించడం ఈ కార్యక్రమ ప్రధాన లక్ష్యమని ఆమె స్పష్టం చేశారు. ఎన్నికల సన్నాహకాలను సమర్థవంతంగా ముందుకు తీసుకెళ్లేందుకు అన్ని స్థాయిల్లో సమన్వయం అవసరమని ఎమ్మెల్యే తంగిరాల సౌమ్య సూచించారు. క్షేత్రస్థాయిలో ఓటరు జాబితా సవరణను ఒక యజ్ఞంలా పూర్తి చేయాలని ఆమె పిలుపునిచ్చారు.

అదే సమయంలో నియోజకవర్గంలో జరుగుతున్న అభివృద్ధి పనులను కూడా ఆమె వివరించారు. కోట్లాది రూపాయలతో నందిగామ నియోజకవర్గంలో మౌలిక వసతుల అభివృద్ధి కొనసాగుతోందని తెలిపారు. ప్రజలకు మెరుగైన సౌకర్యాలు కల్పించడమే ప్రభుత్వ లక్ష్యమని పేర్కొన్నారు.

ఈ సందర్భంగా వైసీపీ నేతలపై ఎమ్మెల్యే తీవ్ర విమర్శలు చేశారు. ఇటీవల నిర్వహించిన రాజకీయ కార్యక్రమాలను ఆమె ఎద్దేవా చేస్తూ ప్రజలను తప్పుదోవ పట్టించే వ్యాఖ్యలు చేయడం సరికాదని హెచ్చరించారు. గత ప్రభుత్వ పాలనపై కూడా ఆమె విమర్శలు చేశారు. అప్పటి పాలనలో అభివృద్ధి పనులు జరగలేదని, గత టీడీపీ ప్రభుత్వంలో నిర్మించిన రోడ్లు, భవనాలపైనే తరువాత పాలన కొనసాగిందని వ్యాఖ్యానించారు.

ప్రజా సమస్యలపై బాధ్యతాయుతంగా మాట్లాడాలని, అజ్ఞానపూరిత వ్యాఖ్యలు చేయడం తగదని ఆమె సూచించారు. అభివృద్ధి, సంక్షేమం లక్ష్యంగా ప్రభుత్వం పనిచేస్తోందని, ప్రజల విశ్వాసం పొందడమే ముఖ్యమని ఆమె పేర్కొన్నారు. ఈ కార్యక్రమంలో టీడీపీ నేతలు, బూత్ స్థాయి కార్యకర్తలు పెద్ద సంఖ్యలో పాల్గొన్నారు.