నందిగామ కోనేరు పునరుద్ధరణపై ఎమ్మెల్యే తంగిరాల సౌమ్య స్పష్టత

నందిగామ పట్టణంలోని ఆధ్యాత్మిక వారసత్వానికి చిహ్నమైన శ్రీ శుకశ్యామలాంబ సమేత శ్రీ రామలింగేశ్వర స్వామివారి కోనేరు (పుష్కరిణి) పునరుద్ధరణపై నెలకొన్న వివాదాలు మరియు ప్రజా ఆందోళనల నేపథ్యంలో నందిగామ శాసన సభ్యురాలు, ప్రభుత్వ విప్ తంగిరాల సౌమ్య స్పష్టమైన వివరణ ఇచ్చారు. కోనేరు అభివృద్ధి పనుల విషయంలో ప్రజల్లో ఉన్న అనుమానాలు, ఆందోళనలను దృష్టిలో ఉంచుకుని ఆమె తన కార్యాలయం ద్వారా అధికారిక ప్రకటన విడుదల చేశారు.

ఈ సందర్భంగా ఎమ్మెల్యే తంగిరాల సౌమ్య మాట్లాడుతూ, కోనేరు పునరుద్ధరణ విషయంలో ఎలాంటి ఆందోళన అవసరం లేదని స్పష్టం చేశారు. ఉన్నత న్యాయస్థానం ఇచ్చిన తీర్పు ప్రకారం అన్ని పనులు చట్టబద్ధంగానే జరుగుతాయని, ఇందులో ఎటువంటి సందేహాలకు తావు లేదని ఆమె పేర్కొన్నారు. చట్టం తన పని తాను చేసుకుపోతుందని, ఎవరి జోక్యానికి అవకాశం లేదని ఆమె భరోసా ఇచ్చారు.

కోనేరు అభివృద్ధి ప్రణాళికలో భాగంగా కొన్ని ప్రాంతాల్లో ఉన్న పేద కుటుంబాల సమస్యలను కూడా మానవతా దృక్పథంతో పరిశీలిస్తున్నామని తెలిపారు. ముఖ్యంగా దక్షిణం వైపు సిమెంట్ రోడ్డుకు ఆవల ఉన్న నిరుపేద కుటుంబాలకు నష్టం కలగకుండా చర్యలు తీసుకోవాలని కోరినట్లు ఆమె వెల్లడించారు. అభివృద్ధి పనులకు ఆటంకం కలగకుండా, పేదల హక్కులు కాపాడటం ప్రభుత్వ లక్ష్యమని ఆమె అన్నారు.

ప్రస్తుత పరిస్థితుల్లో కొందరు వ్యక్తులు ఈ అంశాన్ని సాకుగా తీసుకుని సోషల్ మీడియా ద్వారా ఇతర సున్నితమైన విషయాలను లేవనెత్తి కొత్త సమస్యలు సృష్టించే ప్రయత్నాలు చేస్తున్నారని ఆమె హెచ్చరించారు. ఇలాంటి చర్యలు సమాజంలో అశాంతికి దారితీయవచ్చని, అందరూ బాధ్యతాయుతంగా వ్యవహరించాలని ఆమె సూచించారు.

భక్తుల మనోభావాలను గౌరవిస్తూ, కోనేరు పునరుద్ధరణ పనులు పారదర్శకంగా, చట్టబద్ధంగా కొనసాగుతాయని జిల్లా కలెక్టర్ మరియు సంబంధిత అధికారులు చర్యలు తీసుకుంటారని ఎమ్మెల్యే భరోసా ఇచ్చారు. ప్రజలు సంయమనంతో వ్యవహరించి అభివృద్ధి కార్యక్రమాలకు సహకరించాలని ఆమె విజ్ఞప్తి చేశారు.