దివ్యాంగులు, వృద్ధులకు ఎంపీ డాక్టర్ బైరెడ్డి శబరి భరోసా

నంద్యాల పార్లమెంట్ సభ్యురాలు డాక్టర్ బైరెడ్డి శబరి దివ్యాంగులు, వయోవృద్ధులకు అండగా నిలుస్తూ భారీ స్థాయిలో సహాయక పరికరాల పంపిణీకి ఏర్పాట్లు చేశారు. నంద్యాల పార్లమెంట్ పరిధిలోని ఏడు అసెంబ్లీ నియోజకవర్గాలకు చెందిన అర్హులైన లబ్ధిదారులకు ఈ నెల పదిహేనవ తేదీన నంద్యాలలో పరికరాలు పంపిణీ చేయనున్నారు. సుమారు నాలుగు కోట్ల రూపాయల విలువైన పరికరాలను మూడు వేల మందికి పైగా దివ్యాంగులు, వృద్ధులకు అందించనున్నారు.

భారత ప్రభుత్వ పథకాల కింద దివ్యాంగులకు అవసరమైన సహాయక పరికరాలు, వయోవృద్ధులకు ఉపయోగపడే ఉపకరణాలను ఉచితంగా అందించే కార్యక్రమాన్ని చేపట్టారు. గతంలో నిర్వహించిన ప్రత్యేక అంచనా శిబిరాల ద్వారా అర్హులైన లబ్ధిదారులను గుర్తించి వారి అవసరాలకు అనుగుణంగా పరికరాలను సిద్ధం చేశారు.

నంద్యాల జిల్లాలోని వివిధ ప్రాంతాల్లో నిర్వహించిన శిబిరాల్లో దివ్యాంగులు, వృద్ధుల ఆరోగ్య పరిస్థితులు, అవసరాలను పరిశీలించి తగిన పరికరాలను ఎంపిక చేశారు. ఇప్పటికే పంపిణీకి సంబంధించిన పరికరాలు నంద్యాలకు చేరుకున్నాయని అధికారులు తెలిపారు. కార్యక్రమం విజయవంతంగా నిర్వహించేందుకు సంబంధిత శాఖలు ఏర్పాట్లు చేస్తున్నాయి.

సామాజిక న్యాయం, సాధికారత లక్ష్యాలతో కేంద్ర, రాష్ట్ర ప్రభుత్వాల సహకారంతో ఈ కార్యక్రమం నిర్వహిస్తున్నట్లు వెల్లడించారు. దివ్యాంగులు స్వయం సమర్థులుగా జీవించేందుకు, వయోవృద్ధులు సౌకర్యవంతమైన జీవనం గడపేందుకు ఈ పరికరాలు ఉపయోగపడనున్నాయి. ప్రజల జీవితాల్లో మార్పు తీసుకురావడమే ఈ కార్యక్రమం ముఖ్య ఉద్దేశమని పేర్కొన్నారు.

నంద్యాల టెక్కె వ్యవసాయ మార్కెట్ యార్డు ఆవరణలో జరిగే ఈ కార్యక్రమంలో పెద్ద సంఖ్యలో లబ్ధిదారులు పాల్గొననున్నారు. అవసరమైన వారికి సరైన సమయంలో సహాయం అందించాలనే లక్ష్యంతో ఈ కార్యక్రమాన్ని చేపట్టినట్లు డాక్టర్ బైరెడ్డి శబరి తెలిపారు. దివ్యాంగులు, వయోవృద్ధుల సంక్షేమానికి తాము ఎల్లప్పుడూ కట్టుబడి ఉంటామని ఆమె స్పష్టం చేశారు.