మచిలీపట్నంలో రూ.6.30 కోట్ల విద్యుత్ ఉపకేంద్రానికి శంకుస్థాపన

మచిలీపట్నం బచ్చుపేటలో నూతన 33/11 కెవి ఇండోర్ విద్యుత్ ఉపకేంద్రానికి మంత్రి కొల్లు రవీంద్ర శంకుస్థాపన చేశారు. రూ.6.30 కోట్ల వ్యయంతో నిర్మించనున్న ఈ ఆధునిక ఉపకేంద్రం ద్వారా పట్టణంలో నిరంతర, నాణ్యమైన విద్యుత్ సరఫరా అందించడమే లక్ష్యమని మంత్రి తెలిపారు.

ఈ సందర్భంగా మంత్రి మాట్లాడుతూ రాష్ట్రంలో విద్యుత్ సంస్కరణలకు శ్రీకారం చుట్టిన ఘనత ముఖ్యమంత్రి నారా చంద్రబాబు నాయుడిదేనని పేర్కొన్నారు. 2014 నుంచి 2019 మధ్య విద్యుత్ రంగంలో చేపట్టిన సంస్కరణల వల్ల రాష్ట్రం విద్యుత్ మిగులు స్థితికి చేరిందని చెప్పారు. రాష్ట్ర విభజన అనంతరం విద్యుత్ కొరత ఉన్నప్పటికీ దాన్ని అధిగమించగలిగామని గుర్తుచేశారు.

మచిలీపట్నం పట్టణంలో సుమారు 70 వేల కనెక్షన్లు, గ్రామీణ ప్రాంతాల్లో 30 వేల కనెక్షన్లు, దాదాపు 3,500 ఆక్వా కనెక్షన్లు ఉన్నాయని మంత్రి వెల్లడించారు. ఆక్వా రంగానికి యూనిట్‌కు రూ.1.50 మాత్రమే వసూలు చేస్తున్నామని, ఎస్సీ, ఎస్టీ, నాయి బ్రాహ్మణ, చేనేత వర్గాలకు 200 యూనిట్ల వరకు ఉచిత విద్యుత్ అందిస్తున్నామని తెలిపారు.

సాంప్రదాయ విద్యుత్ ఉత్పత్తితో పాటు సోలార్, విండ్, హైడల్ విద్యుత్ ఉత్పత్తికి కూడా ప్రభుత్వం ప్రాధాన్యం ఇస్తోందని మంత్రి వివరించారు. నాణ్యమైన విద్యుత్ సరఫరా ఉన్నప్పుడే రాష్ట్రానికి పెట్టుబడులు, పరిశ్రమలు వస్తాయని ఆయన అన్నారు.

గత ప్రభుత్వంపై విమర్శలు చేసిన మంత్రి, విద్యుత్ ఒప్పందాలను రద్దు చేయడం వల్ల రాష్ట్రంలో సంక్షోభం ఏర్పడిందని ఆరోపించారు. యూనిట్‌కు తక్కువ ధరలో ఉన్న ఒప్పందాలను రద్దు చేసి అధిక ధరలకు కొనుగోలు చేయడం వల్ల ప్రజలపై భారీ భారం పడిందని పేర్కొన్నారు.

ప్రస్తుతం కూటమి ప్రభుత్వం అధికారంలోకి వచ్చిన తర్వాత చరిత్రలో తొలిసారిగా విద్యుత్ చార్జీలను తగ్గించి ప్రజలకు ఉపశమనం కల్పించామని తెలిపారు. అలాగే అనకాపల్లిలో రూ.5,000 కోట్ల పెట్టుబడితో సోలార్ ప్యానెల్ తయారీ పరిశ్రమకు శంకుస్థాపన చేసినట్లు గుర్తుచేశారు.

కేంద్ర ప్రభుత్వం ప్రకటించిన సూర్య ఘర్ పథకాన్ని ప్రజలు సద్వినియోగం చేసుకోవాలని మంత్రి పిలుపునిచ్చారు. నియోజకవర్గంలో పదివేల కనెక్షన్ల లక్ష్యాన్ని నిర్దేశించుకున్నామని తెలిపారు.

మచిలీపట్నం పోర్టు త్వరలో పూర్తికానుందని, పోర్టు ఆధారిత పరిశ్రమలు రానున్న నేపథ్యంలో అవసరమైన విద్యుత్ సదుపాయాలు కల్పిస్తామని మంత్రి కొల్లు రవీంద్ర హామీ ఇచ్చారు. ఈ కొత్త ఉపకేంద్రం పట్టణ అభివృద్ధికి కీలకంగా మారనుంది.