కూటమి రెండేళ్ల విజయోత్సవ సభ ఏర్పాట్లను పరిశీలించిన ప్రభుత్వ విప్

కురుపాం నియోజకవర్గ కేంద్రంలో సోమవారం జరగనున్న కూటమి ప్రభుత్వం రెండేళ్ల విజయోత్సవ సభ ఏర్పాట్లను ఆంధ్రప్రదేశ్ ప్రభుత్వ విప్, కురుపాం ఎమ్మెల్యే తోయక జగదీశ్వరి పరిశీలించారు. సభా ప్రాంగణాన్ని సందర్శించిన ఆమె వేదిక ఏర్పాటు, కూర్చునే సౌకర్యాలు, తాగునీరు, పార్కింగ్, భద్రతా చర్యలు వంటి అంశాలను సమగ్రంగా పరిశీలించి నిర్వాహకులకు సూచనలు చేశారు.

నియోజకవర్గంలోని ఐదు మండలాల నుంచి పెద్ద సంఖ్యలో నాయకులు, కార్యకర్తలు హాజరుకానున్న నేపథ్యంలో ఎలాంటి ఇబ్బందులు తలెత్తకుండా అన్ని ఏర్పాట్లు పూర్తిచేయాలని ఆమె ఆదేశించారు. సభకు వచ్చే ప్రజలకు సౌకర్యవంతమైన ఏర్పాట్లు ఉండేలా చర్యలు తీసుకోవాలని సూచించారు.

ఈ సందర్భంగా ఎమ్మెల్యే మాట్లాడుతూ కూటమి ప్రభుత్వం అధికారంలోకి వచ్చి రెండేళ్లు పూర్తైన సందర్భంగా నిర్వహిస్తున్న ఈ విజయోత్సవ సభ ప్రజలకు ప్రభుత్వ అభివృద్ధి, సంక్షేమ కార్యక్రమాలను వివరించే వేదికగా నిలుస్తుందని తెలిపారు. ప్రభుత్వం అమలు చేస్తున్న పథకాలను ప్రజల్లోకి తీసుకెళ్లడమే లక్ష్యమని పేర్కొన్నారు.

కూటమి నాయకులు, కార్యకర్తలు, అభిమానులు పెద్ద సంఖ్యలో పాల్గొని కార్యక్రమాన్ని విజయవంతం చేయాలని ఆమె పిలుపునిచ్చారు. ఈ పరిశీలన కార్యక్రమంలో పార్టీ నాయకులు, తెలుగు యువత ప్రతినిధులు పాల్గొన్నారు.