సీఎం రేవంత్‌రెడ్డికి కేటీఆర్ బహిరంగ లేఖ..

తెలంగాణ సీఎం రేవంత్‌రెడ్డికి బీఆర్ఎస్ వర్కింగ్ ప్రెసిడెంట్ కేటీఆర్ బహిరంగ లేఖ రాశారు. ఫీజు రీయింబర్స్‌మెంట్ వ్యవస్థపై ప్రభుత్వం తీసుకున్న నిర్ణయాలపై ఆయన తీవ్ర స్థాయిలో విమర్శలు చేశారు.

ప్రభుత్వం తీసుకొచ్చిన జీఓ-7 కారణంగా సుమారు 14 లక్షల మంది విద్యార్థుల భవిష్యత్‌ను ప్రమాదంలోకి నెట్టారని కేటీఆర్ ఆరోపించారు. ఎస్సీ, ఎస్టీ, బీసీ, మైనార్టీ విద్యార్థుల విద్యా భవిష్యత్‌ను అంధకారంలోకి నెట్టే విధంగా ఈ నిర్ణయం ఉందని ఆయన లేఖలో పేర్కొన్నారు.

ఫీజు రీయింబర్స్‌మెంట్‌ను పూర్తిగా రద్దు చేయడానికే ఈ జీఓ తీసుకువచ్చారని ఆయన విమర్శించారు. గత ప్రభుత్వాలు అమలు చేసిన విద్యార్థి సంక్షేమ పథకాలను దెబ్బతీసే విధంగా ప్రస్తుత ప్రభుత్వం వ్యవహరిస్తోందని ఆయన ఆరోపించారు.

కేసీఆర్ ప్రభుత్వ పథకాలే కాకుండా, వైఎస్ రాజశేఖర రెడ్డి తీసుకువచ్చిన పథకాలకూ నష్టం కలిగించే ప్రయత్నం జరుగుతోందా? అని కేటీఆర్ ప్రశ్నించారు. ఇది ప్రజా వ్యతిరేక నిర్ణయమని ఆయన అభిప్రాయపడ్డారు.

ఈ దుర్మార్గమైన జీఓను వెంటనే వెనక్కి తీసుకోవాలని, ప్రభుత్వం విద్యార్థులకు క్షమాపణ చెప్పాలని ఆయన డిమాండ్ చేశారు. అలాగే ఫీజు బకాయిలను తక్షణమే విడుదల చేయాలని ఆయన ప్రభుత్వాన్ని కోరారు.

విద్యార్థులు ఉద్యమిస్తే పరిస్థితి నియంత్రణలో ఉండదని ప్రభుత్వాన్ని హెచ్చరించారు. విద్యార్థుల భవిష్యత్‌తో రాజకీయాలు చేయడం సరికాదని కేటీఆర్ తన లేఖలో స్పష్టం చేశారు.