రేవంత్ వ్యాఖ్యలపై కిషన్‌రెడ్డి ఫైర్

ఢిల్లీ: తెలంగాణ సీఎం రేవంత్‌రెడ్డి రాముడు, శివుడిపై చేసిన వ్యాఖ్యలు రాజకీయ వివాదానికి దారితీశాయి. ఢిల్లీలో జరిగిన కార్యక్రమంలో రేవంత్‌రెడ్డి ఉత్తర, దక్షిణ భారతాల మత, రాజకీయ గుర్తింపులను ప్రస్తావిస్తూ రాముడిని ధనికులతో, శివుడిని పేదలతో అనుసంధానిస్తూ వ్యాఖ్యలు చేశారు. ఈ వ్యాఖ్యలపై బీజేపీ నేతలు తీవ్రంగా స్పందించారు.

కేంద్ర మంత్రి కిషన్‌రెడ్డి రేవంత్‌రెడ్డి వ్యాఖ్యలను ఖండించారు. రాముడు వేరు, శివుడు వేరు అన్నట్లుగా మాట్లాడటం సరికాదని అన్నారు. హిందూ సమాజంలో ప్రజలు వివిధ దేవుళ్లను ఆరాధిస్తారని, దేవుళ్ల విషయంలో విభజనకు తావు ఇవ్వకూడదని పేర్కొన్నారు. రేవంత్‌రెడ్డి బాధ్యతారహితంగా మాట్లాడుతున్నారని విమర్శించారు.

కాంగ్రెస్ ప్రభుత్వం ఇచ్చిన ఆరు హామీల అమలుపై దృష్టి పెట్టకుండా మతాలు, దేవుళ్ల అంశాలను తెరపైకి తీసుకొస్తోందని కిషన్‌రెడ్డి ఆరోపించారు. గత బీఆర్‌ఎస్‌ ప్రభుత్వ తరహాలోనే రేవంత్‌రెడ్డి ప్రభుత్వం వ్యవహరిస్తోందని, ప్రభుత్వ వైఫల్యాలను కప్పిపుచ్చుకునేందుకే ఇలాంటి వ్యాఖ్యలు చేస్తున్నారని ఆయన విమర్శించారు.

ఇదిలా ఉండగా, రేవంత్‌రెడ్డి వ్యాఖ్యలను బీజేపీ నేతలు తప్పుపట్టగా.. కాంగ్రెస్ నేతలు మాత్రం బీజేపీ రాముడిని రాజకీయ అంశంగా ఉపయోగించడంపై సీఎం విమర్శలు చేశారని వివరణ ఇచ్చారు. దీంతో రాముడు, శివుడిపై వ్యాఖ్యల అంశం తెలంగాణ రాజకీయాల్లో మరో వివాదానికి దారితీసింది.