2028లో ఆట ముగిస్తాం : కిషన్‌రెడ్డి

తెలంగాణ ముఖ్యమంత్రి రేవంత్ రెడ్డిపై కేంద్రమంత్రి కిషన్ రెడ్డి తీవ్ర స్థాయిలో మండిపడ్డారు. మెట్రోరైల్ ప్రాజెక్టుకు కేంద్ర ప్రభుత్వం నిధులు అందించిందని ఆయన స్పష్టం చేశారు. నిధుల విషయంపై తప్పుదారి పట్టించే వ్యాఖ్యలు చేయడం సరికాదని ఆయన వ్యాఖ్యానించారు.

మెట్రోకు కేంద్రం డబ్బులు ఇవ్వకపోతే తాము రాజీనామా చేస్తామని చెప్పిన విషయాన్ని ప్రస్తావించిన కిషన్ రెడ్డి, హామీలు అమలు చేయని వారు ముందుగా రాజీనామా చేయాలా అని ప్రశ్నించారు. రేవంత్ రెడ్డి తనను బెదిరించేలా మాట్లాడుతున్నారని, కానీ తాను భారతీయ జనతా పార్టీ కార్యకర్తనని ఆయన స్పష్టం చేశారు.

తనను అడ్డుకునే ధైర్యం కాంగ్రెస్ పార్టీకి ఉందా అని ప్రశ్నించిన ఆయన, “నన్ను తరిమికొట్టే వ్యక్తి ఈ గడ్డపై పుట్టలేదు” అని వ్యాఖ్యానించారు. తెలంగాణ ప్రజల హక్కుల విషయంలో కాంగ్రెస్ ప్రభుత్వం వెన్నుపోటు పొడిచిందని ఆయన ఆరోపించారు.

రాహుల్ గాంధీ, రేవంత్ రెడ్డి ఎవరు రాజీనామా చేస్తారో స్పష్టం చేయాలని కిషన్ రెడ్డి డిమాండ్ చేశారు. రేవంత్ రెడ్డి రాజకీయ ఆట మొదలు పెట్టారని, దాన్ని 2028లో బీజేపీ ముగిస్తుందని ఆయన వ్యాఖ్యానించారు. కాంగ్రెస్, బీఆర్ఎస్ రెండూ ఒక్కటేనని ఆరోపిస్తూ ఆయన తీవ్ర విమర్శలు చేశారు.