క్లాస్ చెబుతూనే కుప్పకూలిన టీచర్

ఖమ్మం నగరంలో విషాదకర ఘటన చోటుచేసుకుంది. మమతా రోడ్డులోని శ్రీ చైతన్య స్కూల్ ఒలింపియాడ్ క్యాంపస్‌లో ఉపాధ్యాయుడిగా పనిచేస్తున్న జయరాజు పాఠాలు బోధిస్తుండగానే అకస్మాత్తుగా కుప్పకూలి మరణించిన ఘటన కలకలం రేపింది.

జయరాజు బోధనా విధానాల్లో ప్రత్యేక ప్రతిభ కలిగిన ఉపాధ్యాయుడిగా సహచరుల మధ్య మంచి గుర్తింపు పొందారు. విద్యార్థులకు పాఠాలు చెబుతూనే ఉన్న సమయంలో ఆయన ఒక్కసారిగా కుప్పకూలిపోవడంతో క్లాస్‌రూమ్‌లో ఉన్నవారు షాక్‌కు గురయ్యారు.

సహచర ఉపాధ్యాయులు వెంటనే స్పందించి ఆయనను లేపే ప్రయత్నం చేసినప్పటికీ, అప్పటికే ఆయన స్పృహ కోల్పోయినట్లు తెలిసింది. వెంటనే పరీక్షించిన వైద్యులు ఆయన మృతి చెందినట్లు నిర్ధారించడంతో పాఠశాల వాతావరణం విషాదంలో మునిగిపోయింది.

ఈ ఘటన మొత్తం పాఠశాలలోని సీసీ కెమెరాల్లో రికార్డు కావడంతో వీడియో సోషల్ మీడియాలో వైరల్ అవుతోంది. క్లాస్‌రూమ్‌లో చోటుచేసుకున్న ఈ అకస్మాత్తు ఘటన చూసి విద్యార్థులు, ఉపాధ్యాయులు తీవ్రంగా దిగ్భ్రాంతికి గురయ్యారు.

పాఠశాల యాజమాన్యం, సహచర ఉపాధ్యాయులు జయరాజు మృతిపై సంతాపం వ్యక్తం చేస్తూ, కుటుంబ సభ్యులకు ప్రగాఢ సానుభూతి తెలిపారు.