జంగారెడ్డిగూడెంలో లాడ్జీలపై పోలీసుల ఆకస్మిక దాడులు..

పశ్చిమగోదావరి జిల్లా జంగారెడ్డిగూడెంలో లాడ్జీలపై పోలీసులు ఆకస్మిక తనిఖీలు నిర్వహించారు. ఏఎస్పీ సుస్మిత ఐపీఎస్ ఆదేశాల మేరకు నిర్వహించిన ఈ మెరుపు దాడుల్లో ఇన్స్పెక్టర్ ఎం.వి. సుభాస్, ఎస్ఐ వీరప్రసాద్‌తో పాటు పోలీస్ సిబ్బంది పాల్గొన్నారు. పట్టణంలో శాంతిభద్రతల పరిరక్షణలో భాగంగా ఈ తనిఖీలు చేపట్టినట్లు అధికారులు తెలిపారు.

తనిఖీల సందర్భంగా లాడ్జీల్లోని రిజిస్టర్లను పోలీసులు క్షుణ్ణంగా పరిశీలించారు. గదులు అద్దెకు ఇచ్చే ముందు ప్రతి సందర్శకుడి ఆధార్ వంటి గుర్తింపు పత్రాలను తప్పనిసరిగా నమోదు చేయాలని లాడ్జీ యజమానులకు స్పష్టమైన ఆదేశాలు జారీ చేశారు. అనుమానాస్పద వ్యక్తులు వస్తే వెంటనే పోలీసులకు సమాచారం ఇవ్వాలని సూచించారు.

అలాగే ప్రతి లాడ్జీలో సీసీ కెమెరాలు తప్పనిసరిగా పనిచేస్తూ ఉండాలని, వాటి రికార్డింగ్ నిరంతరం కొనసాగాలని అధికారులు ఆదేశించారు. నిబంధనలు ఉల్లంఘించే లాడ్జీలపై కఠిన చట్టపరమైన చర్యలు తీసుకుంటామని పోలీసులు హెచ్చరించారు.

రాబోయే పండుగలు, ఉత్సవాల నేపథ్యంలో ఎటువంటి అవాంఛనీయ సంఘటనలు జరగకుండా ముందస్తు భద్రతా చర్యలలో భాగంగా ఈ తనిఖీలు చేపట్టినట్లు తెలిపారు. ప్రజల భద్రత కోసం ఇటువంటి ఆకస్మిక తనిఖీలు నిరంతరం కొనసాగుతాయని అధికారులు స్పష్టం చేశారు.