అమెరికా వేడుకల్లో భారత నౌక 'సుదర్శిని' ప్రత్యేక ఆకర్షణ

భారత నావికాదళానికి చెందిన ఇండియన్ నేవల్ సెయిల్ ట్రైనింగ్ షిప్ (INSTS) సుదర్శిని అమెరికా స్వాతంత్ర్య 250వ వార్షికోత్సవ వేడుకల్లో పాల్గొని ప్రత్యేక ఆకర్షణగా నిలిచింది. కమాండర్ రవికాంత్ నందూరి నేతృత్వంలోని ఈ నౌక, మేరీల్యాండ్ రాష్ట్రంలోని బాల్టిమోర్ హార్బర్‌లో నిర్వహిస్తున్న SAIL250 Maryland మరియు Airshow Baltimore కార్యక్రమాల్లో భాగమైంది. ప్రపంచంలోని పలు దేశాల టాల్ షిప్స్, సైనిక నౌకలు, వైమానిక విన్యాసాలు ఒకే వేదికపై ప్రదర్శించే ఈ వేడుకల్లో భారత నౌక పాల్గొనడం రెండు దేశాల మధ్య బలమైన సముద్ర భద్రతా, వ్యూహాత్మక సంబంధాలకు ప్రతీకగా భావిస్తున్నారు. నిర్వాహకుల సమాచారం ప్రకారం, సుదర్శిని జూలై 1 వరకు బాల్టిమోర్ ఇన్నర్ హార్బర్ వెస్ట్ వాల్ వద్ద ప్రజల సందర్శనకు అందుబాటులో ఉంటుంది. ఈ పర్యటన ద్వారా భారత్-అమెరికా నౌకాదళాల మధ్య సహకారం, సాంస్కృతిక అనుబంధం మరింత బలోపేతం కానుందని అధికారులు తెలిపారు.