గ్రీవెన్స్‌లో భూ వివాదాలపై ఫిర్యాదులు

ఆంధ్రప్రదేశ్‌లోని టీడీపీ కేంద్ర కార్యాలయంలో నిర్వహించిన ప్రజావినతుల స్వీకరణ కార్యక్రమం (గ్రీవెన్స్)లో భూ వివాదాలు, ప్రభుత్వ భూముల ఆక్రమణలు, రికార్డుల తారుమారు, దౌర్జన్యాలు, న్యాయం కోసం ఎదురుచూస్తున్న పలు గ్రామాల ప్రజల సమస్యలు వెలుగులోకి వచ్చాయి. రాష్ట్రంలోని వివిధ జిల్లాల నుంచి వచ్చిన బాధితులు తమకు ఎదురవుతున్న సమస్యలను నేతలకు విన్నవిస్తూ తక్షణ న్యాయం చేయాలని కోరారు. ఈ కార్యక్రమంలో ముస్లిం మైనారిటీ, న్యాయ శాఖ మంత్రి ఎన్.ఎమ్.డి. ఫరూక్, శాసనమండలి చీఫ్ విప్ పంచుమర్తి అనురాధ తదితరులు అర్జీలు స్వీకరించి సమస్యల పరిష్కారానికి చర్యలు తీసుకుంటామని భరోసా ఇచ్చారు.

కడప జిల్లా ఒంటిమిట్ట మండలం క్రొత్తమాధవరం గ్రామానికి చెందిన నరసింహులు తన గ్రామంలో జాతీయ రహదారికి ఆనుకుని ఉన్న సుమారు 40 సెంట్ల ప్రభుత్వ భూమిని మాజీ వైసీపీ సర్పంచ్ అక్రమంగా ఆక్రమించుకున్నారని ఫిర్యాదు చేశారు. ఆ స్థలంలో ఎటువంటి అనుమతులు లేకుండానే శాశ్వత కట్టడాలు నిర్మించి అద్దెకు ఇస్తూ ఆర్థిక లాభాలు పొందుతున్నారని ఆరోపించారు. అంతేకాకుండా పక్కన ఉన్న ప్రభుత్వ స్థలాలను కూడా అక్రమంగా విక్రయిస్తున్నారని తెలిపారు. ఎమ్మార్వో మరియు పంచాయతీ అధికారులు కూడా ఆ భూమికి సంబంధించి ఎటువంటి చెల్లుబాటు పత్రాలు లేవని ధృవీకరించినప్పటికీ, నకిలీ డాక్యుమెంట్లు సృష్టించి కోర్టు ద్వారా తాత్కాలిక స్టే పొందినట్లు తెలిపారు. దీనిపై చర్యలు తీసుకోవాలని కోరారు.

అనంతపురం జిల్లా కూడేరు మండలంలోని కమ్మూరు గ్రామానికి చెందిన లక్ష్మీకాంతమ్మ తన తండ్రికి ప్రభుత్వం మంజూరు చేసిన 5 ఎకరాల భూమి అన్యాయంగా ఇతరుల పేర్లపై రికార్డు చేయబడిందని ఆవేదన వ్యక్తం చేశారు. తండ్రి మరణించిన తరువాత నోటీసులు ఇవ్వకుండా వీఆర్వో, ఎమ్మార్వోలు కలిసి ఆన్‌లైన్ రికార్డులను మార్చారని ఆరోపించారు. కోర్టులో కేసు పెండింగ్‌లో ఉన్నప్పటికీ మరిన్ని వ్యక్తుల పేర్లపై భూమి నమోదు చేశారని తెలిపారు. దీనిపై తక్షణ విచారణ చేయాలని కోరారు.

అన్నమయ్య జిల్లా దూలంవారిపల్లి గ్రామానికి చెందిన శ్రీనివాసులు తన కుటుంబానికి చెందిన 1.58 ఎకరాల భూమిని దౌర్జన్యంగా ఆక్రమించారని తెలిపారు. స్థానిక బలవంతులు అధికారుల సహకారంతో రికార్డులు మార్చి భూమిని ఆక్రమించుకున్నారని, తాము అనేకసార్లు ఫిర్యాదు చేసినా న్యాయం జరగలేదని ఆవేదన వ్యక్తం చేశారు. అదే జిల్లాకు చెందిన మరొక గ్రామస్థుడు కూడా తన వారసత్వ భూమిని రాజకీయ పలుకుబడితో ఇతరులు అక్రమంగా తమ పేర్లపై మార్చుకున్నారని ఆరోపించారు.

ప్రకాశం జిల్లా దొనకొండ మండలం గంగాదేవిపల్లి గ్రామానికి చెందిన మయబ్రహ్మచారి తన తల్లి పేరుతో ఉన్న భూమిని బలవంతంగా ఆక్రమించుకున్నారని, అధికారులను లోబరుచుకుని రికార్డులు మార్చారని ఆరోపించారు. భూమి విషయంపై ప్రశ్నించినప్పుడు ప్రాణహాని బెదిరింపులు ఎదురవుతున్నాయని తెలిపారు.

సత్యసాయి జిల్లా ధర్మవరం మండలానికి చెందిన పెద్దన్న తన భూమిని స్థానిక బలవంతులు అన్యాయంగా ఆక్రమించారని, అనేకసార్లు అధికారులకు ఫిర్యాదు చేసినా చర్యలు లేవని చెప్పారు. అలాగే గుమ్మగట్ట గ్రామానికి చెందిన హనుమక్క తన ఇంటి నిర్మాణాన్ని కొందరు దుండగులు ధ్వంసం చేశారని, కోర్టు ఆదేశాలు ఉన్నప్పటికీ అధికారులు సహకరించడం లేదని ఆవేదన వ్యక్తం చేశారు.

కొత్తచెరువు మండలానికి చెందిన రామిరెడ్డి తన భూమి కొనుగోలు ఒప్పందం విషయంలో చెక్కులు బౌన్స్ కావడంతో పాటు తనపై దాడి జరిగిందని ఆరోపించారు. పుట్టపర్తి సమీపంలో ప్రాణహాని ప్రయత్నం జరిగిందని తెలిపారు. మరో కేసులో నందలూరు మండలానికి చెందిన శ్యామలమ్మ తన బావగారి వారసత్వ భూమిని రాజకీయ నాయకుల సహకారంతో అక్రమంగా ఇతరుల పేర్లపై మార్చారని ఆరోపించారు.

అదేవిధంగా పెద్దవడుగూరు మండలానికి చెందిన రామాంజనేయులు తమ కుటుంబం 70 ఏళ్లుగా సాగు చేస్తున్న డి-పట్టా భూమిని ఇతరులు అక్రమంగా రికార్డుల్లో నమోదు చేసుకున్నారని తెలిపారు.

ఈ ఫిర్యాదులతో పాటు అనేక మంది పింఛన్లు, రేషన్ కార్డులు, ఇళ్ల నిర్మాణాలు, ఉద్యోగాలు, వైద్య సహాయం వంటి సమస్యలపై కూడా అర్జీలు సమర్పించారు. కొంతమంది ఉద్యోగాల కోసం రిజ్యూమ్‌లు అందజేయగా, మరికొందరు ఆర్థిక సహాయం కోసం విజ్ఞప్తి చేశారు.

మొత్తానికి ఈ గ్రీవెన్స్ కార్యక్రమం ద్వారా రాష్ట్రవ్యాప్తంగా ప్రజలు ఎదుర్కొంటున్న భూ వివాదాలు, రికార్డు తారుమారులు, అధికార దుర్వినియోగం వంటి సమస్యలు స్పష్టంగా బయటపడ్డాయి. బాధితులు న్యాయం కోసం ప్రభుత్వాన్ని గట్టిగా కోరగా, నేతలు సమస్యలను పరిశీలించి తగిన చర్యలు తీసుకుంటామని హామీ ఇచ్చారు.