ఫ్రాన్స్ కార్చిచ్చులో బయటపడ్డ రెండో ప్రపంచ యుద్ధ ఆయుధాలు

దక్షిణ ఫ్రాన్స్‌లో చెలరేగిన భారీ కార్చిచ్చు అనుకోని ప్రమాదకర విషయాన్ని బయటపెట్టింది. లే పోర్జ్ గ్రామంలో జరిగిన అగ్నిప్రమాదం అనంతరం భూమిలో దాచిపెట్టిన సుమారు 400 చారిత్రక పేలుడు పదార్థాలు, ఆయుధాలు బయటపడ్డాయి. స్థానిక అధికారుల సమాచారం ప్రకారం, ఈ ఆయుధాలు రెండో ప్రపంచ యుద్ధ కాలానికి చెందినవిగా భావిస్తున్నారు. మంటల తీవ్రత కారణంగా వేడెక్కిన ఈ పాత ఆయుధాలు పేలిపోయి ఉండవచ్చని అధికారులు అనుమానిస్తున్నారు.

కార్చిచ్చు సమయంలో వినిపించిన భారీ పేలుళ్లు మొదట గ్యాస్ సిలిండర్లు పేలుతున్నాయని భావించారు. అయితే దర్యాప్తు అనంతరం అవి భూమిలో దాచిన పాత యుద్ధ సామగ్రి కారణంగా జరిగి ఉండవచ్చని గుర్తించారు. స్థానిక అగ్నిమాపక అధికారి మీడియాతో మాట్లాడుతూ, మంటల వేడి కారణంగా రెండో ప్రపంచ యుద్ధానికి చెందిన పేలుడు పదార్థాలు క్రియాశీలమై పేలిపోయి ఉండవచ్చని తెలిపారు.

లే పోర్జ్ గ్రామంలో కార్చిచ్చు రెండో రోజు రాత్రి 100కుపైగా పేలుళ్ల శబ్దాలు వినిపించాయని మేయర్ మార్షల్ జానినెట్టి తెలిపారు. ఆ శబ్దాలు యుద్ధ వాతావరణాన్ని తలపించాయని ఆయన పేర్కొన్నారు. వరుస పేలుళ్లతో స్థానిక ప్రజలు తీవ్ర భయాందోళనలకు గురయ్యారు. అగ్నిమాపక సిబ్బంది, భద్రతా అధికారులు పరిస్థితిని అదుపులోకి తీసుకురావడానికి తీవ్రంగా శ్రమించారు.

అగ్నిప్రమాదం అనంతరం పేలుడు పదార్థాలను తొలగించే ప్రత్యేక బృందాలు రంగంలోకి దిగాయి. డీమైండింగ్ చర్యల ద్వారా ప్రమాదకరమైన ఆయుధాలను గుర్తించి సురక్షితంగా తొలగించే ప్రక్రియ కొనసాగింది. ఈ చర్యల అనంతరం చాలా మంది గ్రామస్థులు తిరిగి తమ ఇళ్లకు చేరుకున్నారు. అయితే కొన్ని ప్రాంతాలను ఇంకా ప్రమాదకర ప్రాంతాలుగా గుర్తించి ప్రజల ప్రవేశాన్ని నిషేధించారు.

ఈ కార్చిచ్చు కారణంగా ఆ ప్రాంతంలో భారీ నష్టం సంభవించింది. 180కుపైగా ఇళ్లు అగ్నికి ఆహుతైనట్లు అధికారులు వెల్లడించారు. అనేక కుటుంబాలు తాత్కాలికంగా సురక్షిత ప్రాంతాలకు తరలించాల్సి వచ్చింది. మంటల ప్రభావంతో ఆస్తి నష్టం మాత్రమే కాకుండా, భూమిలో దాగి ఉన్న పాత ఆయుధాల కారణంగా భద్రతా సమస్యలు కూడా ఎదురయ్యాయి.

లే పోర్జ్ మున్సిపాలిటీలో గతంలో ఆయుధ నిల్వలు భూమిలో పాతిపెట్టబడి ఉన్నాయని అధికారులు గుర్తించారు. అయితే స్థానిక పరిపాలనకు ఈ విషయం గురించి ముందుగా సమాచారం లేదని మేయర్ తెలిపారు. "మా ప్రాంతంలో భూమిలో ఆయుధ నిల్వలు ఉన్నాయని తెలియదు, అవే ఇప్పుడు పేలాయి" అని ఆయన పేర్కొన్నారు.

పేలిన ఆయుధాలు వివిధ దిశల్లోకి ఎగిరాయని మేయర్ వివరించారు. కొన్ని పేలుడు పదార్థాలు కుడివైపు, మరికొన్ని ఎడమ వైపు వెళ్లాయని, ఒకటి ఏకంగా ఓ ఇంటిని దాటి వెళ్లిందని తెలిపారు. దీంతో గ్రామంలో ఉన్న ప్రజల భద్రతపై అధికారులు మరింత అప్రమత్తమయ్యారు.