క్యారల్‌కు పరిహారం చెల్లించాలి.. ట్రంప్‌కు కొత్త ఒత్తిడి

అమెరికా అధ్యక్షుడు డొనాల్డ్ ట్రంప్‌కు సంబంధించిన ప్రముఖ న్యాయ వివాదంలో మరో కీలక పరిణామం చోటుచేసుకుంది. రచయిత్రి ఈ. జీన్ క్యారల్‌కు 5 మిలియన్ డాలర్ల పరిహారం చెల్లించాలంటూ కోర్టు ఇప్పటికే ఇచ్చిన తీర్పును అమలు చేయాలని ఆమె న్యాయవాదులు తాజాగా కోర్టును కోరారు. అమెరికా సుప్రీంకోర్టు ట్రంప్ దాఖలు చేసిన అప్పీల్‌ను పునఃసమీక్షించేందుకు నిరాకరించిన మరుసటి రోజే ఈ విజ్ఞప్తి చేయడం ప్రాధాన్యం సంతరించుకుంది.

ఈ కేసు గత కొన్ని సంవత్సరాలుగా అమెరికాలో విస్తృత చర్చకు దారితీసింది. ఈ. జీన్ క్యారల్ తనపై 1990లలో డొనాల్డ్ ట్రంప్ లైంగిక దాడికి పాల్పడ్డారని ఆరోపించారు. అనంతరం ఈ ఆరోపణలను ట్రంప్ ఖండించడమే కాకుండా, ఆ ఘటనను అబద్ధమని, కల్పిత కథనమని పేర్కొన్నారని ఆమె వాదించారు. దీంతో ఆమె సివిల్ కేసు దాఖలు చేశారు.

దీర్ఘకాల న్యాయపోరాటం అనంతరం 2023 మేలో న్యూయార్క్ జ్యూరీ కీలక తీర్పు వెలువరించింది. ట్రంప్‌పై క్యారల్ చేసిన ఆరోపణల్లో కొన్నింటికి సంబంధించి ఆయన బాధ్యత వహించాలని జ్యూరీ నిర్ధారించింది. అలాగే క్యారల్ పరువునష్టం పొందినట్లు కూడా తేల్చింది. ఈ నేపథ్యంలో ఆమెకు 5 మిలియన్ డాలర్ల పరిహారం చెల్లించాలని నిర్ణయించింది.అయితే ట్రంప్ ఈ తీర్పును అంగీకరించలేదు. తీర్పును సవాల్ చేస్తూ వివిధ కోర్టుల్లో అప్పీలు చేశారు. ఫెడరల్ న్యాయవ్యవస్థలోని పలు స్థాయిల్లో ఈ కేసు విచారణకు వచ్చింది. ట్రంప్ తరఫు న్యాయవాదులు తీర్పును రద్దు చేయాలని, కేసును మళ్లీ పరిశీలించాలని వాదించారు. కానీ ఇప్పటివరకు ప్రతి దశలోనూ కోర్టులు ఆ అభ్యర్థనలను తిరస్కరించాయి.

ఇటీవల అమెరికా సుప్రీంకోర్టును కూడా ట్రంప్ ఆశ్రయించారు. అయితే అత్యున్నత న్యాయస్థానం ఈ కేసును పునఃసమీక్షించాలన్న అభ్యర్థనను స్వీకరించలేదు. దీంతో దిగువ కోర్టుల తీర్పులు యథాతథంగా కొనసాగుతున్నాయి. ఈ పరిణామం క్యారల్ తరఫుకు పెద్ద విజయంగా భావిస్తున్నారు