బడ్డుకొండ అప్పలనాయుడు వైసీపీకి రాజీనామా

విజయనగరం జిల్లాలో వైఎస్సార్‌ కాంగ్రెస్‌ పార్టీకి మరో షాక్‌ తగిలింది. మాజీ ఎమ్మెల్యే బడ్డుకొండ అప్పలనాయుడు ఆ పార్టీకి రాజీనామా చేశారు. పార్టీలో తనకు, తన అనుచరులకు తగిన గౌరవం దక్కడం లేదని పేర్కొంటూ వైసీపీ నుంచి వైదొలుగుతున్నట్లు ప్రకటించారు. ఇటీవల పార్టీ వ్యవహారాలపై ఆయన చేసిన వ్యాఖ్యలు రాజకీయంగా చర్చనీయాంశంగా మారాయి.

వైఎస్సార్‌ కాంగ్రెస్‌ పార్టీ తనపై క్రమశిక్షణ చర్యలు తీసుకోవడాన్ని అప్పలనాయుడు తీవ్రంగా ప్రశ్నించారు. వైసీపీ ఒక రాజకీయ పార్టీగా కాకుండా ప్రైవేట్‌ లిమిటెడ్‌ కంపెనీగా వ్యవహరిస్తోందని ఆయన ఆరోపించారు. తనపై అకారణంగా చర్యలు తీసుకున్నారని, అదే సమయంలో ఇతర నేతల విషయంలో ఎందుకు భిన్నంగా వ్యవహరిస్తున్నారని ప్రశ్నించారు. ముఖ్యంగా బొత్స సత్యనారాయణపై ఎందుకు చర్యలు తీసుకోలేదని నిలదీశారు.

వైసీపీ అధినేత, పులివెందుల ఎమ్మెల్యే వైఎస్‌ జగన్‌మోహన్‌రెడ్డిపై కూడా అప్పలనాయుడు తీవ్ర వ్యాఖ్యలు చేశారు. జగన్‌ నియంతలా వ్యవహరిస్తున్నారని ఆరోపించారు. పార్టీలో భిన్నాభిప్రాయాలకు, నాయకుల అభిప్రాయాలకు తగిన స్థానం లేకుండా పోయిందని విమర్శించారు. పార్టీ నిర్ణయాల విషయంలో నాయకులు, కార్యకర్తల అభిప్రాయాలను పరిగణనలోకి తీసుకోవడం లేదని ఆయన పేర్కొన్నారు.

ప్రజా వ్యతిరేక నిర్ణయాలు, విధానాల కారణంగానే 2024 ఎన్నికల్లో వైఎస్సార్‌ కాంగ్రెస్‌ పార్టీ ఘోర పరాజయాన్ని ఎదుర్కొందని అప్పలనాయుడు అభిప్రాయపడ్డారు. ప్రజల తీర్పును పార్టీ నాయకత్వం సమీక్షించుకోవాల్సిన అవసరం ఉందని ఆయన సూచించారు. ఎన్నికల ఫలితాల తర్వాత కూడా పార్టీ వ్యవహారశైలిలో మార్పు కనిపించడం లేదని విమర్శించారు.

తన రాజకీయ భవిష్యత్తుపై అప్పలనాయుడు స్పష్టత ఇవ్వకపోయినా, వైసీపీకి రాజీనామా చేయడం విజయనగరం జిల్లా రాజకీయాల్లో ప్రాధాన్యం సంతరించుకుంది. ఇప్పటికే జిల్లాలో పలువురు నేతలు పార్టీకి దూరమవుతున్న సమయంలో మాజీ ఎమ్మెల్యే రాజీనామా చేయడం వైసీపీ శ్రేణుల్లో చర్చకు దారితీసింది. తనతో పాటు ఉన్న అనుచరులతో చర్చించి తదుపరి రాజకీయ నిర్ణయం తీసుకునే అవకాశం ఉందని రాజకీయ వర్గాల్లో చర్చ జరుగుతోంది.

ఇటీవలే జిల్లాకు చెందిన మరో కీలక నేత మజ్జి శ్రీనివాసరావు కూడా వైసీపీకి రాజీనామా చేసి తెలుగుదేశం పార్టీలో చేరారు. ఈ పరిణామాల నేపథ్యంలో బడ్డుకొండ అప్పలనాయుడు రాజీనామా మరింత ప్రాధాన్యం సంతరించుకుంది. అయితే అప్పలనాయుడు తదుపరి ఏ రాజకీయ పార్టీలో చేరతారనే అంశంపై ఇంకా అధికారిక ప్రకటన వెలువడలేదు.