రేపు కృష్ణా జిల్లాలో మంత్రి నారా లోకేష్ పర్యటన..

మంత్రి నారా లోకేష్ రేపు కృష్ణా జిల్లాలో విస్తృత పర్యటన చేపట్టనున్నారు. ఈ సందర్భంగా విద్య, ఆధ్యాత్మిక, రాజకీయ, సామాజిక కార్యక్రమాల్లో పాల్గొని స్థానిక ప్రజలు, పార్టీ నాయకులు, మత్స్యకారులతో సమావేశం కానున్నారు.

ఉదయం 10 గంటల నుంచి 11 గంటల వరకు అవనిగడ్డ నియోజకవర్గంలోని మోపిదేవి మండలం కొక్కిలిగడ్డ గ్రామంలో నూతనంగా నిర్మించిన జిల్లా పరిషత్ పాఠశాల భవనాన్ని ప్రారంభించనున్నారు. అనంతరం ఉదయం 11.10 గంటల నుంచి 11.40 గంటల వరకు మోపిదేవిలోని శ్రీ సుబ్రహ్మణ్యేశ్వర స్వామి దేవాలయాన్ని సందర్శించి ప్రత్యేక పూజల్లో పాల్గొంటారు.

మధ్యాహ్నం 12 గంటల నుంచి 1.30 గంటల వరకు మోపిదేవి గ్రామంలోని ఓ వేదిక వద్ద అవనిగడ్డ నియోజకవర్గానికి చెందిన తెలుగుదేశం పార్టీ కార్యకర్తలు, నాయకులతో సమన్వయ సమావేశంలో పాల్గొననున్నారు. పార్టీ బలోపేతం, స్థానిక రాజకీయ పరిస్థితులు, భవిష్యత్ కార్యాచరణపై చర్చించే అవకాశం ఉంది.

సాయంత్రం 4.15 గంటల నుంచి 5 గంటల వరకు అవనిగడ్డ మండలం పులిగడ్డ గ్రామంలోని గురుకుల పాఠశాల వద్ద ఏర్పాటు చేసిన కార్యక్రమంలో మత్స్యకారులతో సమావేశమవుతారు. వారి సమస్యలు, అభివృద్ధి అవసరాలు, ప్రభుత్వ పథకాల అమలుపై చర్చించనున్నట్లు సమాచారం.

మొత్తంగా మంత్రి నారా లోకేష్ కృష్ణా జిల్లా పర్యటనలో విద్య, దేవాలయ దర్శనం, పార్టీ సమావేశం, మత్స్యకారులతో ముఖాముఖి వంటి పలు కీలక కార్యక్రమాల్లో పాల్గొననున్నారు.