రష్యా చమురుపై భారత్‌ మొగ్గు..

భారత్‌కు రష్యా నుంచి ముడి చమురు సరఫరా గణనీయంగా పెరుగుతోంది. అంతర్జాతీయ మార్కెట్లో రాయితీ ధరలకు చమురు అందుబాటులో ఉండటంతో భారత్‌ రష్యా నుంచి భారీగా కొనుగోళ్లు కొనసాగిస్తోంది. డేటా ఇంటెలిజెన్స్ సంస్థ కెప్లర్‌ విడుదల చేసిన తాజా గణాంకాల ప్రకారం, మే నెలలో రోజుకు 1.91 మిలియన్ బ్యారెళ్ల చమురును దిగుమతి చేసుకున్న భారత్‌.. జూన్‌ 19 నాటికి రోజువారీ దిగుమతులను 2.66 మిలియన్ బ్యారెళ్లకు పెంచింది. ఇది ఇటీవలి కాలంలో నమోదైన అత్యధిక స్థాయిల్లో ఒకటిగా భావిస్తున్నారు. చమురు దిగుమతుల పరంగా రష్యా భారత్‌కు ప్రధాన సరఫరాదారుగా తన స్థానాన్ని మరింత బలోపేతం చేసుకుంది.

రష్యాతో పాటు గల్ఫ్ దేశాల నుంచి కూడా చమురు కొనుగోళ్లు వేగం పుంజుకున్నాయి. ముఖ్యంగా యునైటెడ్ అరబ్ ఎమిరేట్స్‌ నుంచి భారత్‌కు చమురు సరఫరా దాదాపు రికార్డు స్థాయికి చేరుకుంది. జూన్‌ 19 నాటికి యూఏఈ నుంచి రోజుకు సగటున 6.36 లక్షల బ్యారెళ్ల ముడి చమురు దిగుమతి నమోదైంది. అలాగే సౌదీ అరేబియా నుంచి రోజుకు 3.84 లక్షల బ్యారెళ్లు దిగుమతి అవుతుండగా, వెనెజువెలా నుంచి 2.09 లక్షల బ్యారెళ్ల చమురు కొనుగోలు జరుగుతోంది. దీంతో వెనెజువెలా భారత్‌కు నాలుగో అతిపెద్ద చమురు సరఫరాదారుగా అవతరించింది.

మరోవైపు అమెరికా నుంచి చమురు దిగుమతులు గణనీయంగా తగ్గాయి. మే నెలలో రోజుకు 2.52 లక్షల బ్యారెళ్లుగా ఉన్న దిగుమతులు జూన్‌ 19 నాటికి 91 వేల బ్యారెళ్లకు పడిపోయాయి. ధరల పోటీ, రవాణా వ్యయాలు, రాయితీల ప్రభావంతో భారత చమురు కొనుగోలు వ్యూహంలో మార్పులు చోటుచేసుకున్నట్లు విశ్లేషకులు భావిస్తున్నారు.

ప్రపంచ చమురు రవాణాకు అత్యంత కీలకమైన హర్మూజ్ జలసంధి తిరిగి తెరవబడటంతో గల్ఫ్ దేశాల నుంచి సరఫరాలు కూడా సాధారణ స్థితికి చేరుకుంటున్నాయి. ప్రపంచంలో మూడో అతిపెద్ద ఇంధన దిగుమతిదారైన భారత్‌ తన ముడి చమురు, ఎల్‌ఎన్‌జీ, ఎల్‌పీజీ అవసరాల కోసం సౌదీ అరేబియా, ఇరాక్‌, కువైట్‌, ఖతార్‌ వంటి గల్ఫ్ దేశాలపై అధికంగా ఆధారపడుతోంది. హర్మూజ్ మార్గం పునరుద్ధరణతో సరఫరా అంతరాయాలపై ఉన్న ఆందోళనలు తగ్గాయి.

చమురు ఎగుమతిదారుల మధ్య పెరుగుతున్న పోటీ, రాయితీ ధరల ఆఫర్లు, అంతర్జాతీయ మార్కెట్ పరిస్థితుల నేపథ్యంలో జూన్‌ చివరి నాటికి భారత్‌ రోజువారీ చమురు దిగుమతులు 2.35 మిలియన్ బ్యారెళ్లను మించి కొత్త రికార్డు సృష్టించే అవకాశముందని కెప్లర్‌ అంచనా వేసింది. గల్ఫ్ దేశాల నుంచి కొనుగోళ్లు పెరుగుతున్నప్పటికీ రష్యా నుంచి చమురు సరఫరా కూడా కొనసాగుతుందని, భారత ఇంధన భద్రత వ్యూహంలో రష్యా కీలక భాగస్వామిగానే నిలిచే అవకాశముందని నిపుణులు అభిప్రాయపడుతున్నారు.