చివరి బంతి..చివరి పరుగు.. ఉత్కంఠ భరితమైన గెలుపు

- చివరి బంతి థ్రిల్లర్‌లో గుజరాత్ గెలుపు 

 - రాహుల్ పోరాటం వృథా 

 ఢిల్లీ: ఐపీఎల్ 2026 సీజన్‌లో భాగంగా అరుణ్ జైట్లీ స్టేడియంలో జరిగిన ఢిల్లీ క్యాపిటల్స్–గుజరాత్ టైటాన్స్ మ్యాచ్ ప్రేక్షకులను ఉత్కంఠకు గురిచేసింది. చివరి బంతి వరకు ఉత్కంఠభరితంగా సాగిన ఈ పోరులో గుజరాత్ టైటాన్స్ ఒక్క పరుగు తేడాతో ఢిల్లీపై సంచలన విజయం సాధించింది. టాస్ గెలిచిన ఢిల్లీ తొలుత ఫీల్డింగ్ ఎంచుకోగా, గుజరాత్ టైటాన్స్ నిర్ణీత 20 ఓవర్లలో 4 వికెట్ల నష్టానికి 210 పరుగుల భారీ స్కోరు నమోదు చేసింది. కెప్టెన్ శుభ్‌మన్ గిల్ 70 పరుగులతో ఇన్నింగ్స్‌ను సమర్థంగా నడిపించగా, జోస్ బట్లర్ కేవలం 27 బంతుల్లో 52 పరుగులతో దూకుడుగా ఆడాడు. వాషింగ్టన్ సుందర్ 32 బంతుల్లో 55 పరుగులు చేసి జట్టుకు బలమైన ముగింపు అందించాడు. 211 పరుగుల లక్ష్యంతో బరిలోకి దిగిన ఢిల్లీ క్యాపిటల్స్‌కు ఓపెనర్లు కేఎల్ రాహుల్ (92), పాతుమ్ నిస్సంక (41) అద్భుత ఆరంభాన్ని అందించారు. తొలి వికెట్‌కు 76 పరుగులు జోడించి జట్టును గెలుపు దిశగా నడిపించారు. అయితే మిడిల్ ఆర్డర్ పూర్తిగా విఫలమవడంతో మ్యాచ్ మలుపు తిరిగింది. నితీష్ రాణా, సమీర్ రిజ్వీ వరుస బంతుల్లో ఔట్ కావడం ఢిల్లీకి పెద్ద దెబ్బగా మారింది. ఒకవైపు వికెట్లు పడుతున్నా కెప్టెన్ కేఎల్ రాహుల్ ఒంటరి పోరాటం కొనసాగిస్తూ 92 పరుగులు చేసి సెంచరీకి చేరువలో ఉండగా సిరాజ్ బౌలింగ్‌లో ఔట్ కావడం మ్యాచ్‌ను గుజరాత్ వైపు మళ్లించింది. చివర్లో డేవిడ్ మిల్లర్ 41 పరుగులతో గట్టి పోరాటం చేసినప్పటికీ, ఢిల్లీ జట్టు లక్ష్యానికి కేవలం ఒక్క పరుగు దూరంలోనే ఆగిపోయింది. ఢిల్లీ బౌలర్లలో ముఖేష్ కుమార్, కుల్దీప్ యాదవ్ తమవంతు ప్రయత్నం చేసినప్పటికీ గుజరాత్ బ్యాటర్ల దూకుడును అడ్డుకోలేకపోయారు. కీలక సమయంలో వికెట్లు పడగొట్టిన గుజరాత్ బౌలర్లు మ్యాచ్‌ను తమ ఆధీనంలోకి తీసుకువచ్చారు. ఈ విజయంతో గుజరాత్ టైటాన్స్ ఈ సీజన్‌లో తిరిగి ఫామ్‌లోకి రాగా, వరుస విజయాలతో దూసుకెళ్తున్న ఢిల్లీ క్యాపిటల్స్‌కు ఇది గట్టి షాక్‌గా మారింది. ముఖ్యంగా మిడిల్ ఆర్డర్ వైఫల్యం, డెత్ ఓవర్లలో బౌలర్ల నిర్లక్ష్యం ఢిల్లీ ఓటమికి కారణమయ్యాయి.